 |
|
"Hazırda davam edən güclü küləkli hava şəraiti ilə əlaqədar hərəkət iştirakçılarını diqqətli və ehtiyatlı olmağa çağırırıq".
Bu barədə Bakı Nəqliyyat Agentliyinin sərnişinlərə müraciətində bildirilir.
"Sərnişinlərdən xahiş edirik ki, dayanacaq pavilyonlarında avtobus gözləyərkən diqqətli olsunlar. Həmçinin, Nəqliyyat Mübadilə Mərkəzlərinin ərazisində və digər yerlərdə yolun hərəkət hissələrinə çıxmamalı, yalnız müəyyən edilmiş dayanacaq məntəqələrində avtobuslara minib-düşməli, yolun qarşı tərəfinə keçərkən müəyyən olunan piyada keçidlərindən istifadə etmələri tövsiyə edilir.
Sürücülərə isə tövsiyə edirik ki, hərəkətdə olarkən yollarda müəyyən edilən sürət həddinə və yol nişanlarının tələblərinə riayət edəsiniz", - deyə qurum bəyan edib.
Bakı, Sumqayıt şəhərləri və Abşeron rayonu üzrə pensiyaların ödənilməsi aprelin 8-nə nəzərdə tutulur.
Bu barədə Dövlət Sosial Müdafiə Fondu məlumat yayıb.
Qeyd olunub ki, güzəştli şərtlərlə pensiya hüququna malik pensiyaçılar istisnadır.
May ayında qeyri-iş günlərinin sayı məlum olub.
Apa xəbər verir ki, bu il 9 May - Faşizm üzərində qələbə günü bazar gününə təsadüf etdiyi üçün Əmək Məcəlləsinə uyğun olaraq, iş və istirahət günlərinin yeri dəyişdiriləcək, 10 may qeyri-iş günü olacaq.
Nazirlər Kabinetinin 3 dekabr 2020-ci il qərarına əsasən, bu il 13 may (cümə axşamı) və 14 may (cümə) isə Ramazan bayramıdır. Həmin günlər də qeyri-iş günüdür.
Eyni zamanda 28 May - Respublika günü də iş günü hesab edilməyən bayram günüdür. Bu il mayın 28-i cümə gününə təsadüf edir.
Beləliklə, may ayında bayramlarla əlaqədar 5 gün iş olmayacaq.
Şənbə və bazar günləri də nəzərə alındıqda, ümumilikdə 14 gün qeyri-iş günüdür
Xəbər verdiyimiz kimi, Prezident İlham Əliyevin sərəncamı ilə Zaur Rauf oğlu Mikayılov Azərbaycan Meliorasiya və Su Təsərrüfatı Açıq Səhmdar Cəmiyyətinin sədri təyin edilib.
Zaur Rauf oğlu Mikayılov “Azərbaycan Supermarket” MMC-nin rəhbəri olub. Sözügedən MMC BRAVO supermarketlərinin sahibi olaraq göstərilir. Bu şirkət 2015-ci ilin fevral ayının 27-də dövlət qeydiyyatına alınıb. Bakı şəhəri Nəsimi rayonu, Neftçilər prospekti ev 153 ünvanında qeydiyyatdadır. Nizamnamə kapitalı 2 min manat təşkil edir.
“Azərbaycan Supermarket” MMC-nin təsisçiləri barədə rəsmi məlumat açıqlanmasa da, bu şirkətin qeydiyyatda olduğu Bakı şəhəri Nəsimi rayonu, Neftçilər prospekti ev 153 ünvanında “Paşa İnşaat”, “Paşa Technology”, “Paşa Sığorta” kimi şirkətlərin də olduğu qeyd olunub.
Həmçinin qeyd edək ki, Vergilər Nazirliyi 2017-ci ilin dekabrında qeydiyyata aldığı “Agro Supply” MMC-nin də qanuni təmsilçisi Zaur Rauf oğlu Mikayılov göstərilmişdi. Sözügedən şirkətin nizamnamə kaptalı isə 100 min manatdır. Müəsssisə “PAŞA Holdinq” MMC ilə eyni hüquqi ünvanda – Bakı şəhəri, Nəsimi rayonu, Neftçilər prospekti, 153-də qeydiyyatdan keçib.
Qeyd edək ki, bir müddət əvvəl PAŞA Holdinq MMC-yə məxsus Azərbaycan Supermarket MMC-nin direktoru Zaur Mikayılov vəzifəsindən azad edilib. Şirkətə rəhbərlik əcnəbi vətəndaşa (Kevin Paul Landi) həvalə olunub.
2021-ci ilin mart ayında 1 ailəyə ödənilən ünvanlı dövlət sosial yardımın məbləği 246 manat təşkil edib.
Dövlət Sosial Müdafiə Fondunun İctimaiyyətlə əlaqələr departamentindən "Ölkə.Az"a bildirilib ki, bu da ötən ilin müvafiq dövrü ilə (mart ayı) müqayisədə 11.6% artım deməkdir.
Ünvanlı dövlət sosial yardımına müraciət etmək qaydası
ÜDSY üçün müraciət edilməsi:
Ailəni təmsil edən yetkinlik yaşına çatmış və əmək qabiliyyətli şəxs ÜDSY-nin alınması üçün müraciət edə bilər. Bunun üçün aşağıdakı sənədləri əldə etməlidir:
Yaşayış yeri üzrə rayon (şəhər) icra hakimiyyəti başçısının inzibati ərazi dairəsi və sahə inzibati ərazi dairəsi üzrə nümayəndəliklərinin ailə tərkibi haqqında arayışı;
Həmin arayışa əsasən notariat orqanı tərəfindən təsdiq edilən təmsilçilik barədə ərizə.
Təmsilçi kompüter və ya mobil telefonlardan istifadə edərək, Əmək və Əhalinin Sosial Müdafiəsi Nazirliyinin rəsmi internet səhifəsində (www.sosial.gov.az) yerləşdirilmiş VEMTAS pəncərəsinə və ya elekron hökumət portalında (www.e-gov.az) Əmək və Əhalinin Sosial Müdafiəsi Nazirliyinin xidmətləri siyahısında “Ünvanlı sosial yardımla bağlı müraciətin edilməsi” bölməsinə daxil olmaqla elektron qaydada Mərkəzləşdirilmiş elektron informasiya sisteminin “Ünvanlı yardım” (VEMTAS) altsisteminə müraciət edir.
Müraciət qeydiyyata alındıqdan sonra komputerin ekranına VEMTAS tərəfindən bu barədə məlumat göndərilir. Bu tarix ailənin sosial yardımın alınması üçün müraciət etdiyi gün sayılır.
"Xəstələrin sayında proqressiv artım müşahidə olunarsa, indiyə kimi tətbiq olunan bütün qadağa növləri tətbiq oluna bilər. Buna misal olaraq SMS icazə sistemi və tam qapadılmanı göstər bilərik".
Bu sözləri "ARB24"ə açıqlamasında həkim İmran Mirizadə bildirib.
Onun sözlərinə görə, sərt karantinin tətbiq olunması xəstəxanaların qəbul edəcəyi xəstə sayından asılıdır:
"Əgər ölkə ərazisində xəstələr üçün nəzərdə tutulumuş rezerv yerlər tükənəcəksə, qadağalar tətbiq oluna bilər. Karantin rejimi ölkə iqtisadiyyatı və vətəndaşlarına ciddi təsir göstərir. Bu səbəbdən Operativ Qərargah vətəndaşları düşünərək bu addımları atır.
Koronavirusa yoluxmuş bütün xəstələr xəstəxana şəraitində müalicə almır. Təbii ki, bunların içində evlərdə müalicə alanlar da var. Xəstəxanada mülaicə alan koronavirus xəstələri aktiv xəstələrin təqribən 30-40 faizini təşkil edir.
Hazırda ölkə ərazisindəki xəstəxanalarda kifayət qədər yer var. Lakin bu da müəyyən limit daxilindədir".
Qeyd edək ki, Azərbaycanda COVID-19 virusuna yoluxmuş aktiv xəstələrin sayı 25 min 412 nəfərdir.
Qazilərimizlə bağlı problemlər var. Müdafiə Nazirliyinin Hospitalı var. Mən həkimlərin işini yüksək qiymətləndirirəm, amma hospitalın işini yox. Qazilər rayondan gəlirlər bura. Avtobusda yoxdur, taksi tutub gəlirlər. Burada onlara resept yazıb deyirlər ki, gedin, dərmanları özünüz alın. Haradan alsın?.
Bunu parlamentdə çıxışı zamanı deputat Aqil Abbas deyib.
O, xatırladıb ki, bununla bağlı onlara şikayətlər daxil olur: “Qazilərə hələlik əlillik dərəcəsi verilməyib: “Bəziləri ordudan təxris edilməyib. Amma onlara deyirlər ki, gedin, özünüz dərman alın. Belə olmamalıdır. Mən Müdafiə Nazirliyinin rəhbərliyini bu məsələyə diqqət etməyə çağırıram. Hospital niyə müalicə ilə məşğul olmur? Qazilərə dərman vermək lazımdır. Bu hospitalın işidir”.
Deputat xatırladıb ki, Daxili İşlər Nazirliyinin qopitalı var: “Oradan nəinki polis əməkdaşları, onların ailə üzvləri, təqaüdə çıxan polislər də həyatının sonuna qədər müalicə alırlar”.
"Bir ildir bu virusla yaşayırıq. Artıq insanlar gedişatın və taktikanın necə olduğunu bilirlər”.
Bunu APA-ya TƏBİB-in xəstəliklərin profilaktikası və kontrolu departamentinin rəhbəri Yaqut Qarayeva deyib.
O, karantin rejimin sərtləşdirilməsi ilə bağlı TƏBİB tərəfindən Nazirlər Kabinetinə müraciətlə bağlı dəqiq nəsə deyə bilməyəcəyini bildirib:
“Hamımız ümid edirik ki, yoluxma sayı artmayacaq. Ümid edirik ki, xəstəliyin gedişatı ağır olmayacaq və xəstəxanalarda çarpayılar dolmayacaq. Dəfələrlə qeyd etmişik yoluxma sayı yüksək olsa belə, xəstəliyin gedişi yüngül olarsa, insanların çoxu xəstəliyi evində keçirirsə, bu, o qədər qorxulu göstərici deyil.
Təhlükəli göstərici o zaman olur ki, ağırlaşan xəstəyə xəstəxanada yer olmur. Bu məqamda hansısa təklifdən və müraciətdən söhbət gedə bilər. Hər birimiz çalışmalıyıq ki, yoluxma sayı artmasın ki, normal olmasa da, normala yaxın şəraitdə yaşamağa davam edə bilək”.
"Bu gün artıq koronavirusla mübarizədə bilinənlər artdığı üçün, əlbəttə, hökumət və aidiyyəti qurumlar qərarları əvvəlki illə müqayisədə daha sakit və uyğun şəkildə verir. Hamı fikirləşirdi ki, bayram ərəfəsində yollar bağlanacaq. Amma bu, belə olmadı. Bu, hədiyyə kimi görünə bilər. Amma məqsəd hədiyyə vermək deyildi. Real vəziyyət dəyərləndirilərək hesablandı ki, yol bağlamaqla artıq çox da fayda verilməyəcək".
Bu sözləri "Musavat TV"nin efirində deputat Rəşad Mahmudov bildirib.
O əlavə edib ki, burada əsas məqsəd yolu bağlamaq deyil, cəmiyyət getdiyi yerdə epidemioloji qaydalara riayət etmək mədəniyyəti göstərərsə, ölkədə heç bir yeri bağlamağa ehtiyac qalmayacaq:
"Ramazan ayında hamının özünə vəzifə borcu kimi qəbul etdiyi bir çox xüsusiyyətlər var. Bunlara bayramda birlikdə olmaq, ünsiyyətin daha çox olması da daxildir. Novruz bayramında biz 700-800 rəqəmlərini görürdüksə, bu gün 2 min-3 min rəqəmlərini görürük. Burada məqsəd kiminsə bayramını əlindən almaq və ya əngəl törətmək deyil. Hər bir dövlət məsuliyyət daşıyır ki, ola biləcək təhlükələrə qarşı cəmiyyətini qoruya bilsin.
Rəqəmlərin bu şəkildə artdığı müddətdə təhsildə atıldığı kimi başqa preventiv tədbirlərinin atılması məcburiyyəti yarana bilər. Çünki istənilən kütləvi yer, istər restoran, istərsə də məscidlərdə yaxın təmas olduğu müddətdə təhlükə yarada bilir. Bunu nəzərə alan hökumətlər də ola biləcək təhlükələr qarşısında iqtisadi və digər zərərlərə rəğmən önləm almaq məcburiyyəti daşıyır".
Bu gündən etibarən İcbari Tibbi Sığorta ölkənin bütün şəhər və rayonlarını əhatə edəcək. Vətəndaş xidmətlər zərfində daxil olan 2550 xidmətdən pulsuz istifadə imkanı qazanacaq. Xidmətdən istifadə üçün bəzi məhdudiyyətlər də aradan qaldırılıb. Belə ki, son qərara əsasən, artıq rayon qeydiyyatında olub Bakıda yaşayan şəxslər də paytaxtda İcbari Tibbi Sığortadan yararlana biləcəklər. Bəs işsiz vətəndaşlar və ya pensiyaçıların da icbari tibbi sığortadan istifadə hüquqi varmı? Cavabı təqdim edəcəyimiz sujetdə biləcəyik.
Pensiyaçılar və işsiz şəxslər də icbari tibbi sığortanın xidmətlər zərfindən ödənişsiz istifadə edə biləcəklər.
İcbari Tibbi sığorta agentliyinin departemanet rəhbəri Vüqar Qurabanov bildirdi ki, icbari tibbi sığorta bütün ölkə əhalisini əhatə edir. Onun sözlərinə görə Pensiyaçılar və işsiz vətəndaşların da tibbi xidmətlər zərfindən istifadə hüquqi var. Əvvəlki qərara əsasən, rayon qeydiyyatında olub Bakıda yaşayan şəxslər icbari tibbi sığortadan istrifadə üçün yaşadıqları yer üzrə qeydiyyata düşməli idilər. Lakin müştərək maliyyələşmə məbləği ləğv olunduğuna görə, həmin şəxslər də paytaxtda tibbi xidmətlərdən yararlana biləcəklər.
Pandemiya şəraitinə görə bəzi xəstəxanalarda icbari tibbi sığortanın tətbiqində çətinliklər var. Vüqar Qurbanov qeyd etdi ki, həmin tibb müəssisələrinin yaxınlığında yaşayan sakinlərin də xidmətdən istifadə etməsi üçün imkanlar yaradılıb.
Vətəndaşlar icbarı tibbi sığortadan yararlanmaq üçün ilk növbədə ilkin səhiyyə xidməti göstərən tibb müəssisələrinə yaxınlaşmalıdır. Vətəndaş ailə həkimi seçdikdən sonra müayinə və ya müalicə edilir. İxtisaslı tibbi yardıma ehtiyac olduğu təqdirdə, göndəriş əsasında ixtisaslı həkimə yönləndirilir. Göndəriş əsasında xəstəxanalara gedən vətəndaşlardan qeydiyyatdan keçmək üçün şəxsiyyət vəsiqəsi tələb olunacaq. Qeyd edək ki, vətəndaşların xidmətlər zərfi çərçivəsində 2550 sayda tibbi xidmətdən istifadə etməsi mümkündür.