Türkiyənin Konya şəhərində tibb bacısı özünə bıçaqla xəsarət yetirib.

“Yol-xeber.az” Türkiyə mətbuatına istinadla xəbər verir ki, beşmərtəbəli binada yaşayan 40 yaşlı tibb bacısı Dilək T. əvvəlcə balkonunun yanındakı beton parçasının üzərinə çıxıb. O, daha sonra  bıçaqla bədəninin müxtəlif nahiyyələrini kəsməyə başlayıb.

Qonşuların zəngi ilə əraziyə gələn polis qadını razı salmağa çalışıb. Polis əməkdaşları sopa ilə bıçağı qadının əlindən yerə salmağa çalışdıqca o bıçağı qarnına batırmağa cəhd edib. Dilək T. hətta balkondan aşağı sallanıb.

Tibb bacısı ilə 2 saat söhbət aparıldıqdan sonra o, polis əməkdaşlarının tutduğu təhlükəsizlik yastığının üzərinə tullanıb.

Yaralı şəxs dərhal xəstəxanaya çatdırılıb.

5 ildir eyni binada yaşayan Dilək T.-nın 2 həftədir işə getmədiyi, son vaxtlarda psixoloji problemləri olduğu üzə çıxıb.