Kollektiv Təhlükəsizlik Müqaviləsi Təşkilatı Rusiya ilə ABŞ arasındakı münasibətlərin gərginləşməsi ilə kifayət qədər çətin dövr yaşayır.

Təbii olaraq, iki dövlət arasındakı “ön xətt” diplomatiya və iqtisadiyyatdan tutmuş, idman və mədəniyyətə qədər insan fəaliyyətinin bütün sahələrindən keçir.

Bu sözləri Axar.az-a Ermənistanın bundan sonrakı dövrdə KTMT üzvlüyünün məqsədyönlülüyü haqqında aparılan debatları şərh edən qazaxıstanlı politoloq Sultanbek Sultanqaliyev deyib.

“Beləliklə, Vaşinqton diplomatik cəbhədə öz peyklərinin - ondan asılı olan və hakimiyyətə ABŞ tərəfdarlarının gəldiyi ölkələrin əli ilə oynamağa üstünlük verir. KTMT daxilində yaranmış fikir ayrılıqlarının ilkin səbəbini də əsasən bu vəziyyətlə izah etmək olar”, - politoloq bildirib.

Onun fikrincə, sələfi və Nikol Paşinyanın özü MDB-nin prezident klubunun – fikirləri Rusiya Prezidenti Vladimir Putin üçün son dərəcə vacib olan Nursultan Nazarbayev və Aleksandr Lukaşenkonun xüsusi etimadına sahib deyil:

“Qısacası, sonuncunun hansı şüarlar və metodlarla hakimiyyətə gəldiyini xatırlayan Rusiya lideri də Ermənistanın baş nazirinə qarşı xüsusi illüziyaya malik deyil. İstənilən halda bu beynəlxalq təşkilatın gələcəkdə uğurlu inkişafı ilə bağlı səsləndirilən fikirlərə əsaslanaraq etiraf etmək lazımdır ki, KTMT-yə “Troya atı” lazım deyil.

Ermənistanın KTMT-dən çıxması təşkilatın hərbi gücünə və üzv ölkələrin strateji təhlükəsizlik məsələlərinə mənfi təsir göstərməyəcək, lakin KTMT daxilində sabitlik yaratmaq və hətta potensial kəmiyyət genişlənməsi üçün uyğun ola bilər”.

O qeyd edib ki, Ermənistanın KTMT-yə qəbul olunması Astananın mövcud geosiyasi maraqları baxımından da məntiqli deyildi:

“Belə ki, Astana sadəcə Rusiya və Belarusla yaxından əməkdaşlığa köklənməyib, eyni zamanda, türk-islam dünyası – Azərbaycan, Türkiyə, Özbəkistan və Qırğızıstan kimi ölkələrlə hərbi-siyasi və ticarət, iqtisadi əlaqələrin dərinləşməsində maraqlıdır.

Düşünürəm ki, rəsmi Astana onun üçün belə bir məntiqsiz müttəfiqin KTMT-nin tərkibindən çıxmasına görə bir o qədər də narahatlıq keçirməz.

Rusiya rəhbərliyinin qarşısında uzun illərdir çətin bir seçim etmək vəzifəsi dayanır. Bu seçim tezliklə edilməlidir: Bu regionda hansı Zaqafqaziya ölkəsi ilə – Azərbaycan, yoxsa Ermənistanla - strateji münasibətlər qurmaq lazımdır? Çünki birmənalı balanslaşdırma ilə müsbət heç bir şeyə nail olmaq mümkün olmayacaq. Rusiya ümumiyyətlə Zaqafqaziyada mövqelərini itirə bilər”.

Twitter