Dünənə qədər Azərbaycanı KTMT ilə hədələyən Ermənistanda bu gün həmin təşkilata üzvlükdən imtina etməsi barədə fikirlər səsləndirilir.

Bunu Axar.az-a açıqlamasında millət vəkili Hikmət Babaoğlu deyib. Deputat Ermənistanın mövqeyindəki bu qəfil radikal dəyişikliyin səbəblərinə aydınlıq gətirib:

“Əvvəla, idmanda olduğu kimi, diplomatiyada da rəqibin gücündən özünə qarşı istifadəetmə metodları var. Azərbaycan uzun illərdir həyata keçirdiyi prinsipial və ardıcıl xarici siyasəti sayəsində işğalçı Ermənistana arxa olan, yaxud bu və ya digər səviyyədə dəstəkləyən ölkələrlə münasibətləri elə səviyyəyə qaldırıb ki, işğalçının özünə arxa hesab etdiyi ayrı-ayrı ölkələr və regional təşkilatlar artıq bu gün İrəvanı dəstəkləməkdən vaz keçiblər. Doğrudur, Cənubi Qafqazda son iki əsrdə formalaşan olduqca həssas geosiyasi tarazlığı dəyişmək çox çətin olsa da, son bir neçə ildə Azərbaycan buna xeyli dərəcədə müvəffəq olub. 2016-cı il Aprel döyüşləri əslində Cənubi Qafqazda baş verə biləcək yeni geosiyasi reallığın başlanğıcı idi. Son iki yüz ildə ilk belə hal idi ki, Azərbaycan hərbi-siyasi reallığı dəyişdimək üçün diktə edən tərəfə çevrildi. Bundan sonra da Ermənistanda eyforiya dövrü başa çatdı və yeni siyasi reallıqlar yaranmağa başladı”.

Millət vəkili işğalçı Ermənistanın artıq siyasi müvazinətini itirdiyini və söykənmək üçün sabit dayaq nöqtəsi tapa bilmədiyini deyib:

“Ona görə də İrəvan tez-tez səhvlərə yol verir. Dolayısı ilə Azəbaycan tərəfindən hər gün bir az daha çox küncə sıxışdırılır. Bir müddət öncə sadəcə Azərbaycan tərəfindən küçə siyasətçisi kimi qiymətləndirilən Paşinyan və onun küçə demokratiyası artıq Ermənistanın KTMT-də müttəfiq olduğu ölkələr tərəfindən də belə qiymətləndirilir. Əlbəttə, bu regional təşkilatın adı və nüfuzu ilk növbədə Rusiya ilə bağlıdır və Ermənistanın bir dövlət kimi meydana gəlməsi də bu ölkənin tarixin müxtəlif dövrlərində qəbul etdiyi siyasi qərarlar nəticəsində yaranan reallıqdır. Ancaq hazırda siyasi proseslər elə istiqamətdə inkişaf edir ki, iki ölkə arasında olan münasibətlər tarixdə heç vaxt olmadığı qədər korlanıb. Bu, olduqca əhəmiyyətli məsələdir. Ona görə ki, regionda siyasi həqiqətləri tərtib edən güc mərkəzlərinin tarixi şəraiti və Azərbaycanın yerini və rolunu qiymətləndirmələri üçün soyuqqanlı, qeyri-emosional və obyektiv qiymətləndirmələri üçün şərtlər yaranıb. Bu tarixi fürsət həm də Rusiya-Azərbaycan münasibətlərində tamamilə yeni bir səhifə açmaq imkanları yaradıb. Onsuz da Rusiya ilə münasibətlərimiz strateji müttəfiqlik səviyyəsində qiymətləndirilir, amma hər iki ölkənin təhlükəsizliyinin təmin oluması baxımından hələ də realizə olunmamış olduqca böyük potensial geosiyasi resurslar var. Bunun baş tutması üçün ilk növbədə regionda işğal faktına son qoyulmalıdır. Bu, bütün region dövlətlərinin siyasi və iqtisadi təhlükəsizliyi baxımından vacibdir. Hazırda Azərbaycanın həyata keçirdiyi xarici siyasət də buna xidmət edir. Ermənistan isə hər gün bir az daha çox dalana sıxışdırılmaqla geosiyasi proseslərin əhəmiyyətsiz aktoruna çevrilir və heç kəs tərəfindən dəstəklənmir”.

Twitter