Növbədənkənar parlament seçkisində iştirak edən üç siyasi qüvvə - İşıqlı Ermənistan və Sasna Çrer partiyaları, həmçinin Biz Bloku qərbyönlü mövqedən çıxış edir və hökuməti bu istiqamətdə tənqid edəcəklərini gizlətmirlər.

Axar.az xəbər verir ki, bu iddia ilə “1in.am” saytı çıxış edib. Hər üçü qurum Rusiya, eləcə də Ermənistanın qoşulduğu alyansların əleyhinə bəyanatlar səsləndirirlər.

Sayta açıqlama verən Sasna Çrer Partiyasının nümayəndəsi Stepan Qriqoryan partiyasının KTMT və Avrasiya İttifaqından dərhal çıxmağı təklif etmədiyini deyib:

“Biz deyirik ki, mütləq qaldırılmalı olan problemlər var. Məsələn, biz hərbi bazanın saxlanılması üçün pul ödəyirik, amma bütün dünyada fərqli vəziyyət hökm sürür. Ölkə başqa kiçik ölkədə baza yerləşdirəndə pulu özü ödəyir.

Siz bilirsiniz ki, bizim vahid hərbi birləşmə barədə razılaşmamız var və burada deyilir ki, əgər Ermənistana qarşı hərbi fəaliyyətlər olsa, o zaman rəhbərlik rus generalına verilməlidir. Niyə?

Belarusla olan son böhran bizim haqlı olduğumuzu sübut edir. Biz problemlər haqqında bir neçə il əvvəl danışanda deyirdilər ki, hər şey qaydasındadır. Biz Rusiya ilə ikitərəfli əsasda işləməliyik, çoxtərəfli yanaşmanın isə bizə fayda verib-vermədiyini müəyyən etməliyik. İkincisi, biz gərək mütləq Rusiya ilə layiqli münasibətə sahib olaq”.

O, Rusiyanın Paşinyana təzyiqlər edəcəyi halda Sasna Çrerin mütləq buna müqavimət göstərəcəyini deyib.

İşıqlı Ermənistan Partiyasından olan keçmiş deputat Gevork Qorqisyan isə partiyanın yalnız Ermənistanın maraqlarına önəm verdiyini söyləyib:

“Biz görürük ki, əvvəlki hökumətlər Ermənistanın maraqlarını bu strukturlarda təmin etmək gücündə deyildilər. Bura sürücülük vəsiqələrinin Rusiyada istifadəsi məsələsindən tutmuş KTMT-də Azərbaycana meyilli baxışa qədər, bütün məsələlər aiddir. Biz yeni hökumətə bir az vaxt verəcəyik ki, bu statusdan Ermənistanın maraqları çərçivəsində istifadə edə bilsin”.

Biz Blokunun nümayəndəsi Anjela Xaçatryan Avrasiya İttifaqına üzvlüyün Ermənistanın ən böyük səhvlərindən biri olduğunu və bunu düzəldilməsi üçün addımlar atılması gərəkdiyini deyib.

“Biz ölkəyə Avropa modeli təklif edirik. Məhz Avropa modeli Ermənistanı inkişafa, azad bazara apara bilər”.

Twitter