Ermənilərin təxribat xarakterli bütün cəhdləri boşa çıxacaq.

Bu sözləri Axar.az-a Ermənistan Müdafiə naziri David Tonoyanın növbəti dəfə Naxçıvanla sərhədə gəlməsini şərh edən politoloq İlqar Vəlizadə deyib. Ekspert bildirib ki, Naxçıvan istiqamətində hərbi-siyasi proseslər aktivləşib:

“Xüsusilə də Azərbaycan Ordusunun Naxçıvanda öz mövqelərini möhkəmləndirməsi prosesi sürətlənib. Ermənilər bunu nəzərdən qaçırmır və dərin narahatlıq keçirirlər. Üstəlik, son vaxtlar erməni ictimaiyyəti Ermənistan ordusunun və yaxud erməni siyasətçilərinin kifayət qədər fəal olmamasından narazılığını ifadə edir. Ermənistan Müdafiə naziri David Tonoyanın da Naxçıvanla sərhədə gələrək oraya baxış keçirməsi məhz bununla bağlıdır. Əlbəttə ki, ermənilərin bu istiqamətə diqqət yetirməsi süni xarakter daşıyır. Erməni tərəfi Azərbaycanın guya Naxçıvan istiqamətindən Ermənistana hücuma hazırlaşdığına dair mənzərə yaratmaq istəyir. Buna görə də Naxçıvan xəritəsindən istifadə edərək, KTMT üzvlərini Azərbaycanla üz-üzə qoymağa çalışırlar. Hazırda bütün səyləri buna yönəldiblər. Ancaq ermənilərin təxribat xarakterli bütün bu cəhdləri boşa çıxacaq”.

Qeyd edək ki, Ermənistan Müdafiə naziri David Tonoyan Naxçıvanla sərhədə gəlib. Sonuncu dəfə Tonoyan sərhəd ərazisinə bir neçə həftə əvvəl Xarici İşlər naziri Levon Mnatsakanyanla birgə gəlmişdi.

Twitter