Prezident İlham Əliyev hər zaman öz çıxışlarında Azərbaycanın milli maraqları məsələsini çox ciddi şəkildə qoruyur və bununla bağlı öz tövsiyələrini bildirir.

Bu sözləri Axar.az-a açıqlamasında millət vəkili Aydın Mirzəzadə deyib. O bildirib ki, Nazirlər Kabinetinin 6 ayın yekununa dair hesabat iclasında da həm sosial-iqtisadi inkişaf, həm ölkə qarşısında duran vəzifələrə açıq şəkildə toxunuldu və onların həlli yolları göstərildi:

“Prezidentin bir neçə gün bundan əvvəl Azərbaycanın enerji sektorunda baş verən problemlə bağlı da çox qəti şəkildə mövqeyini ortaya qoyması bütün cəmiyyətin ürəyindən xəbər verdi. Prezidentin bu məsələ ilə bağlı heç bir izahat qəbul etmədiyinə dair bəyanatı onu göstərdi ki, tək enerji sektoru deyil, bütün sahələr elə şəkildə fəaliyyət göstərməlidir ki, onun acısını sadə vətəndaş çəkməsin. Dövlət məmuru ilk növbədə vətəndaşa qulluq etməkdən ötrüdür. Ona verilmiş səlahiyyət daxilində o, problemləri həll etməli, strateji məsələlər barəsində öz təkliflərini səsləndirməlidir. Prezidentin bu məsələlərlə bağlı bəyanatları onu deməyə əsas verir ki, bizim ölkənin inkişafını daim diqqətdə saxlayan bir liderimiz var”.

Millət vəkili vurğulayıb ki, Prezident İlham Əliyevin Dağlıq Qarabağ məsələsi ilə bağlı fikirləri isə dəyişməzdir:

“Bu, çox vacib bir məqamdır. Yəni Azərbaycanın ərazi bütövlüyü, torpaqlarımızın işğalçı Ermənistana güzəştə gedilməsi məsələsi heç bir zaman müzakirə mövzusu ola bilməz. Beynəlxalq güc, hüquq normaları çərçivəsində işğalda olan ərazilərimiz işğaldan azad olunmalıdır. Problemin həllinin yeganə və düzgün yolu budur. Prezident tərəfindən bu fikir bir daha səsləndirildi”.

Millət vəkilinin sözlərinə görə, həyat da bunu sübut edir ki, torpaqlarımızı işğalda saxlaması Ermənistanı iqtisadi baxımdan məhv edir:

“Ermənistan üçün gələcəkdə də heç bir perspektiv görünmür. Bu gün yeni gələn hakimiyyət ilk növbədə Köçəryan, Sərkisyan hakimiyyəti dövrünün ağır nəticələrini Ermənistanın üzərində hər gün hiss etməkdədir. Cənab prezidentin Ermənistanın yeni hakimiyyətinin konstruktiv mövqe tutacağı ilə bağlı fikri bir daha göstərir ki, Azərbaycan Ermənistana növbəti şans verir. Bununla belə, Azərbaycan torpaqları işğaldan azad etmək əzmindədir. Bunun üçün Azərbaycanın kifayət qədər hüquqi əsasları, həm də ciddi imkanları var”.

Qeyd edək ki, ötən gün Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib.

Twitter