Bu problem “Təbii inhisarlar haqqında qanun”a görə tənzimlənməlidir.

Bu sözləri Axar.az-a açıqlamasında Azəriqaz İB-nin bölgədə və paytaxtda abonentlərə tətbiq etdiyi fantastik cərimələrlə bağlı danışan hüquqşünas Səməd Vəkilov deyib. S.Vəkilov bildirib ki, abunəçinin “Azəriqaz”dan başqa qaz istehsalçısından istifadə etmək hüququ olmadığını nəzərə alsaq, qurum əməkdaşlarının abonentlərin qazını kəsməsi doğru deyil. Belə demək mümkünsə, buna haqqı yoxdur:

"Sayğac ilk dəfə dəyişdiriləndə abunəçiyə kənar müdaxilə barəsində məlumat verilməyib. Kənar müdaxilə barəsində məlumat verilmədiyinə görə hansısa müdaxilənin olması şübhə doğurur. İl ərzində Azəriqaz İB-nin əməkdaşları bütün yerlərdə sayğaclardan mənzilə birləşdirilən qaz xətlərini yoxlayırlar. Ola bilməz ki, bir neçə il ərzində onlar həmin ərazini yoxlamamış olsunlar. Yoxlamayıblarsa, deməli, səhv işçilərdədir. Ona görə də abonentə 1500-2000 min manat cərimə yazmaq ağlasığmazdır.

Digər tərəfdən, “Azəriqaz”ın əməkdaşları mənzili birinci dəfə sayğacı yoxlayanda kənar müdaxiləni müəyyən etməyibsə, sonradan onu müəyyən etməsi mümkün deyil.

Əgər müdaxilə olunubsa belə, qaz xəttini bağlamaq olmaz. “Azəriqaz” təbii inhisara daxil olduğuna görə qaz xətti açıq saxlanılmalıdır və əgər həqiqi bocdursa, həmin borc istehlakçıdan hissə-hissə çıxılmalıdır. Ona görə də bu məsələ barədə abonent məhkəmə qarşısında iddia qaldıra bilər. Əgər abonentin sübutu varsa ki, vaxtlı-vaxtında ödənişini edib və bu ödəniş sayğaca müdaxilənin mümkünlüyünü təsdiqləyir, vətəndaş təzminat davası da aça bilər”.

Qeyd edək ki, son günlərdə Azəriqaz İstehsalat Birliyini sayğacın zədələnməsi iddiası ilə sözügedən qurğuları dəyişdirib və sonra müdaxilə edilməsini əsas gətirərək bir sıra abonentlərə yüksək məbləğdə cərimə yazıb. Sayğaca heç bir müdaxilə edilmədiyini deyən vətəndaşlar qurumun bu addımını əsassız adlandırıb.

Twitter