İyulun 16-da Helsinkidə keçiriləcək Tramp-Putin görüşündə İran mövzusunun mərkəzi yer tutacağına şübhə yoxdur.

Axar.az xəbər verir ki, bu sözləri politoloq Şahin Cəfərli deyib. O bildirib ki, son həftələr İran qüvvələrinin Suriyadan çıxarılması, ən azı ilk mərhələdə İsrail sərhədlərindən uzaqlaşdırılması üçün ABŞ-İsrail-Rusiya üçbucağında intensiv danışıqlar və bazarlıqar gedir:

"Rusiya, prinsipcə, buna razılığını verib. ABŞ isə Suriyanın cənub-qərbindəki müxalif qruplara dəstəyini kəsib və Əsədin həmin əraziləri (İordaniya və İsrail istiqaməti) nəzarətə götürməsinə mane olmur. Bu da ABŞ-ın güzəştidir. Trampın Putindən növbəti xahişi isə böyük ehtimalla sanksiyalar bərpa olunduqdan sonra Rusiyanın İrana yardım etməməsi olacaq. Bunun əvəzində Trampın Putinə nə təklif edə biləcəyi hələlik qeyri-müəyyən qalır. O, bəlkə də Ukraynanı qurbanlıq qoyun kimi masaya qoymaq istəyərdi. Çünki son günlər "Krımın ilhaqını tanıya bilərik" deməsi yəqin bu niyyətdən qaynaqlanır. Lakin Konqres və dövlət aparatı buna qarşı çıxdı. Rusiyaya qarşı sanksiyalar qanun halına salındığı üçün Tramp onları ləğv edə bilməz, amma yeni sanksiyaların tətbiqindən yayınmaq imkanı var. Yəqin ki, onun Putinə güzəşti bu olacaq".

Twitter