Rusiya, Azərbaycan və Ermənistan xarici işlər nazirlərinin mayın 19-da Moskvada üçtərəfli görüşü keçiriləcək.
Bu barədə Rusiya Xarici İşlər Nazirinin sözçüsü Mariya Zaxarova xarici siyasətlə bağlı apardığı brifinqdə bildirib.
Görüşdə Bakı və İrəvan arasında normallaşma prosesi ilə bağlı məsələlər müzakirə olunacaq.

Görüşün gizlinlərini "Sherg.az"a dəyərləndirən siyasi şərhçi Turab Rzayev bildirib ki, Kremldən xüsusi bir qərar çıxacağını gözləmir:

"Rəsmi Moskvanın zəifləməsindən istifadə edən bəzi qüvvələr həm Şərqi Avropada, həm Mərkəzi Asiyada, həm də Qafqazda fəallaşıb. Çin Mərkəzi Asiya və ABŞ-ə, fərqli Avropa dövlətləri isə Cənubi Qafqaza daxil olmağa çalışır. Hətta Fransa imperialist siyasət yürüdür. Həmçinin eyni vəziyyət Şərqi Avropa, Gürcüstan, Moldova və.s ərazilərdə yaşanır.

Düşünürəm ki, Rusiya bununla Qərbə mesaj verərək, söz sahibinin özü olduğunu çatdırır. Bu isə təzə deyil. Brüssel formatında görüşlər keçirilən ərəfədə də, Moskva və Brüsselin təxribatla məşğul olduğunu bildirmişdi.

Eyni şəkildə Zaxarova və Lavrov Vaşinqton planını da qəbul etmirdilər. Hətta bildirdilər ki, Brüssel planı əslində Vaşinqtonun Ukraynadakı münaqişəni Cənubi Qafqaza daşımaq cəhdidir.

Bu görüşlə də söz sahibinin özləri olduğunu göstərirlər. Yəni çatdırırlar ki, Kreml öz təsir imkanlarını işə salaraq, bölgəyə başqa dövlətlərin girişinə mane ola bilər".

Twitter