Bu günə qədər Bakı şəhərinin inzibati ərazisində yerləşdirilən sərt karantin rejimi ilə əlaqəli nəzarətlə bağlı stasionar postların ləğv edilməsi barədə KİV-də məlumatlar yayılır. Bu da haqlı olaraq hərəkət iştirakçılarının aldığı bu informasiya ilə bağlı hərəkətə narazılığın yaranmasına səbəb olur.

Bu barədə Report-a açıqlamasında Bakı Şəhər Baş Polis İdarəsi Dövlət Yol Polisinin bölmə rəisi, polis polkovniki Vaqif Əsədov bildirib.

“Postlar ləğv edilməmişdi ki, bərpa da oluna… Təbii ki, bu postların ləğv edilərək başqa üsulla xidmət etməsi ilə bağlı məlumat vermişik. Təəssüflər olsun ki, bu məlumat başqa formada yayıldığı üçün narahatçılıq yarandı. Buna görə də bir daha bildiririk ki, stasionar postlarda olan xidmət başqa xidmət növü ilə əvəz edilib. Əlbəttə ki, buna səbəb stasionar postlar zamanı suni sıxlığın yaşanması və hərəkətlə bağlı icazələrin ləngiməsində yaranan narazılıq oldu. Hazırda Bakı şəhərinin inzibati ərazisinə düşən bütün küçə və prospektləri tam nəzarətə götürülməklə mobil postların yaradılması və bu postlarda xidmət aparmaqla nəzarət davam etdirilir.

İkincisi isə reydlər təşkil etməklə buna nəzarət edilir. Belə ki, dislokasiya üzrə təhkim edilmiş ərazidə xidmət aparan polis əməkdaşları vasitəsi ilə nəzarəti gücləndirmək, hərəkətdə olan nəqliyyat vasitəsi və bu avtomobildə gedən sərnişinlərin hərəkəti, icazə sənədləri ilə bağlı sənədlərin yoxlanılması qərara alınıb. Bu günə qədər bu sistem üzrə bizim əməkdaşlar xidmət edir. Təəssüflər olsun ki, yenə də bəzi KİV-də stasionar postların ləğv edilməsi ilə bağlı məlumatlar yayılır. Sanki karantin rejimi də ləğv edilir… Belə informasiyalar təbii ki, çaşqınlığa və narahatlığa səbəb olur. Bir daha vətəndaşların bilməsini istəyirəm ki, stasionar postlarda olan xidmət başqa xidmət növü ilə əvəz edilib. Bu üsulla hərəkətə nəzarət edilir”, – V.Əsədov əlavə edib.

Twitter