Kamaləddin Qafarov: “Prezidentimizin Novruz tonqallarını Qarabağda alovlandırması ənənəyə çevrilir”

10:45 23.03.2022 | Baxış sayı: 891

“Martın 20-də Azərbaycan Respublikasının Prezidenti cənab İlham Əliyev və birinci xanım Mehriban Əliyeva Tərtər rayonunun Suqovuşan qəsəbəsinə səfər ediblər. Dövlət başçımızın işğaldan azad edilmiş bu bölgəyə səfəri də bir neçə açılış və təməlqoyma mərasimləri ilə əlamətdar olub. İlk növbədə Suqovuşan qəsəbəsində yeni tikiləcək məscidin təməlini qoyulması xüsusi qeyd olunmalıdır. Məlumdur ki, işğal dövründə ermənilər İslam dini abidələri, o cümlədən məscidlər, türbələr və digər inanc yerlərini xüsusi amansızlıqla dağıdıblar. Qarabağ ərazisində rəsmi fəaliyyət göstərmiş 67 məscidin 63-ü tamamilə, 4-ü isə qismən dağıdılaraq yararsız hala salınıb. Bu misli görünməmiş vandalizm aktları bir daha erməni işğalçılarının vəhşi xislətini tam çılpaqlığı ilə bütün dünyaya nümayiş etdirmiş oldu. Lakin bu gün Azərbaycan işğaldan azad olunmuş ərazilərində bərpa-quruculuq işlərini böyük vüsətlə həyata keçirməkdədir. Prezident İlham Əliyevin göstərişi ilə hazırda Şuşada, Ağdamda, Füzulidə, Zəngilanda, Cəbrayılda, Qubadlıda, Laçında digər tarixi-mədəni abidələrimizlə yanaşı, məscidlərimizin də bərpası və ya yenidən inşası həyata keçirilir. Martın 20-də ölkə Prezidenti İlham Əliyev və birinci xanım Mehriban Əliyeva Tərtər rayonunun Suqovuşan qəsəbəsində yeni tikiləcək məscidin təməlqoyma mərasimində iştirak etməklə xalqımızın və dövlətimizin öz milli adət-ənənələrinə, dini etiqadına və mənəvi irsinə sədaqətini yenidən vurğulamış oldular”.

Bu sözləri mətbuata açıqlamasında Azərbaycan Respublikası Milli Məclisinin deputatı Kamaləddin Qafarov deyib.

Millət vəkili bildirib: “ Suqovuşan qəsəbəsində Müdafiə Nazirliyinin “N” saylı hərbi hissəsinin açılışı xüsusi əhəmiyyət kəsb edən bir məsələdir. Azərbaycanın iqtisadi gücü və dövlət başçısının siyasi iradəsi işğaldan azad edilən ərazilərdə hərbi hissələrin yaradılmasını və onların ən müasir texnikalarla təchizatını mümkün edir. Ən önəmli məqamlardan biri də budur ki, ölkə ictimaiyyəti, bütün xalqımız dövlətin bu siyasətini birmənalı şəkildə dəstəkləyir”.

Milli Məclisin deputatı işğaldan azad olunmuş ərazilərdə idman və turizm kimi sahələrin də inkişaf etdirilməsinin vacibliyini və bu istiqamətdə mühüm addımlar atıldığını vurğulayayıb: “Tərtər rayonunun Suqovuşan qəsəbəsində Turizm İnkişaf Konsepsiyası əsasında yaradılacaq turizm kompleksinin təməlqoyma mərasimində dövlət başçımız şəxsən iştirak etmişdir. Əlbəttə ki, işğaldan azad olunmuş ərazilərdə idmanın inkişaf etdirilməsi də xüsusi əhəmiyyət kəsb edən bir istiqamətdir. Belə ki, xüsusən gənc nəslin sağlam və vətənpərvər ruhda formalaşmasında idmanın rolu olduqca önəmlidir. Ölkədə idmanın inkişafını hər zaman xüsusi diqqət mərkəzində saxlayan Prezident İlham Əliyev bu siyasətin işğaldan azad olunmuş ərazilərdə də uğurla həyata keçirilməsinə ciddi şəkildə nəzarət edir. Bu baxımdan Azərbaycan Kanoe və Avarçəkmə Federasiyası tərəfindən Tərtər rayonunun Suqovuşan qəsəbəsində təşkil edilən ilk avarçəkmə təlim-məşq toplantısının rəsmi açılışı da ölkəmizin idman həyatında mühüm əhəmiyyət kəsb edən bir hadisə kimi qeyd olunmalıdır.”

Prezident İlham Əliyevin Azərbaycan xalqına Novruz bayramı münasibətilə ünvanladığı təbrik çıxışının eyni zamanda insanlarımızın yaradıcı ruhunun daha da yüksəlməsi üçün ən güclü stimul, həm də düşmənlərimizə ünvanlanmış növbəti sərt xəbərdarlıq mesajı olduğunu vurğulayan Kamaləddin Qafarov deyib: “Ölkə Prezidenti İlham Əliyevin Suqovuşan qəsəbəsindən Novruz bayramı münasibətilə Azərbaycan xalqına ünvanladığı təbrik müraciəti həm mənəvi, həm də siyasi aspektdən mühüm əhəmiyyət kəsb edən bir çıxışdır. Vətən müharibəsi Azərbaycanın tarixi qələbəsi ilə başa çatdıqdan sonra Prezident İlham Əliyevin və birinci xanım Mehriban Əliyevanın Novruz bayramlarını işğaldan azad olunmuş ərazilərdə qarşılamaları artıq bir ənənəyə çevrilir. Hamımız gözəl xatırlayırıq ki, ötən il dövlət başçısı bayram tonqalını Şuşada, Cıdır düzündə qalamışdı. Bu il isə bayram tonqalı Tərtər rayonunun Suqovuşan qəsəbəsində alovlandırıldı. Dövlət başçımızın xalqa ünvanladığı təbrik çıxışında da qeyd etdiyi kimi, Suqovuşan qədim Azərbaycanın tarixi ərazisidir. Azərbaycan xalqı bu ərazilərdə və bütün Qarabağda əsrlər boyu yaşayıb. Bu gün bütün Qarabağ və Şərqi Zəngəzur bölgəsində çox genişmiqyaslı abadlıq işləri aparılır, şəhərlər, kəndlər yenidən qurulur. Dövlət başçımızın dediyi kimi, bugünkü güclü Azərbaycan bütün bu işləri görməyə qadirdir. Siyasi iradə var, iqtisadi güc var, xalqımızın səfərbərliyi var, milli həmrəylik ən yüksək zirvədədir və şanlı tarixi Zəfərimiz hər birimiz üçün qürur mənbəyidir. Öz çıxışında Prezident İlham Əliyev xüsusi olaraq qeyd etdi ki, bu gün bütün bölgədə sülhün və təhlükəsizliyin təminatçısı Azərbaycan dövlətidir və Azərbaycan Silahlı Qüvvələridir. Bu bəyanatı, ilk növbədə, erməni separatizmini, erməni faşizmini hələ də dirçəltməyə çalışan qüvvələr diqqətə almalıdırlar. Onlar birdəfəlik bilməlidirlər ki, Azərbaycana qarşı hər hansı ərazi iddiaları Ermənistan üçün ən ağır nəticələrə səbəb ola bilər”.

Kamaləddin Qafarov: “Prezidentimizin Novruz tonqallarını Qarabağda alovlandırması ənənəyə çevrilir”

Bölmənin digər xəbərləri

Xəbər lenti