Nəsimi rayon İcra Hakimiyyətinin icazəsi və göstərişi ilə "Memar Əcəmi" metrostansiyasının yaxınlığındakı ərazidə yaşıllıqların məhv edilməsi və kəsilmiş ağacların yerində obyekt tikilməsi barədə yayılan materiallara aidiyyəti qurumlardan rəsmi cavab verilib.

Axar.az xəbər verir ki, Nəsimi rayon İcra Hakimiyyəti iddiaları təkzib edib.

Məsələ ilə bağlı danışan “Yaşam Residence” şirkətinin icraçı direktoru Elşən Mahmudov isə bildirib ki, şirkətə aid tikinti işləri tamamilə qaydalara uyğun aparılıb:

“Nəsimi rayonu 20 Yanvar küçəsi-30 ünvanında şirkətimizə aid olan ərazidə tikinti işi başladılıb. Bu ərazi 2006-cı ildən etibarən şəxsi mülkiyyətimizə verilmiş torpaq sahəsidir.

Bildirmək istəyirəm ki, mediada birtərəfli məlumatların yayılması əsassızdır. Tikinti aparılması üçün əvvəlcədən qanun çərçivəsində aidiyyəti qurumlara yazılı müraciət edilib, razılıq əldə olunub.

Bütün sənədlər toplanılıb, müvafiq qurumlara göndərilib. Eyni zamanda Ekologiya və Təbii Sərvətlər Nazirliyinə tikinti sahəsinə düşən iki ağacın köçürülməsi üçün müraciət edilib. Müraciət əsasında nazirliyin təşkil etdiyi ekspert qrupu əraziyə baxış keçirib.

Daha sonra nazirliyin çıxardığı qərar əsasında Bakı Şəhər İcra Hakimiyyətinin Yaşıllaşdırma Təsərrüfatı Birliyinin əməkdaşları ərazidəki 2 ağacı qaydalara uyğun şəkildə başqa əraziyə köçürüblər”.

Bakı Şəhər İcra Hakimiyyətinin Yaşıllaşdırma Təsərrüfatı Birliyinin Bitkilərin Mühafizəsi şöbəsinin rəisi Orxan Məmmədovda saytımıza açıqlamasında Elşən Mahmudovun fikirlərini təsdiqləyərək, prosedurların tam qaydalara uyğun, Ekologiya və Təbii Sərvətlər Nazirliyinin rəyi rəyi və müvafiq məktubu əsasında aparıldığını deyib:

“Sözügedən ərazidən ağacların başqa əraziyə köçürülməsinin əks olunduğu görüntülər mətbuata təqdim olunub. Ərazidə iki ağac – 1 ədəd zeytun, 1 ədəd şam kəsilib, qalanları isə Motodrom kimi tanınan ərazidə yerləşən tinglik sahəyə köçürülüb”.

Qeyd edək ki, ərazidə ağacların kəsildiyi bildirilmişdi və foto yayılmışdı. Təkzib materialında köçürüldüyü bildirilən ağaclar isə kəsilməzdən əvvəl görüntüsü yayılan ağaclara bənzəmir və yaxud, köçürülərkən şam ağaclarının bütün yaşıl budaqlarının budandığı təəssüratı yaranır.

Müqayisə üçün fotoları təqdim edirik:

• 
• 

Twitter