 |
|
Prezident İlham Əliyev pandemiya səbəbilə aprelin 6-da imzaladığı əfv sərəncamının şamil olunduğu məhkumlardan biri azadlığa çıxmaqdan imtina edən edib.
Bu faktı Modern.az saytına açıqlamasında Əfv Məsələləri Komissiyasının üzvü Əliməmməd Nuriyev bildirib.
Ə.Nuriyev qeyd edib ki, şərti adı M.A olan həmin şəxs övladını öldürüb:
"Yaşı 65-dən yuxarı olan məhkum əfv sərəncamındakı kriteriyalara uyğun gəlsə də, ərizə yazaraq könüllü şəkilədə azadlıqdan imtina etdi:
"Çünki azadlıqda onu gözləyən kimsə yox idi. Övladını öldürdüyündən ailənin digər üzvlərilə intriqaları davam edir, ailə onu bağışlamayıb. Həmin şəxs əfv olunsaydı, ailə daxilində başqa konflikt yarana bilərdi. Bildiyiniz kimi, əfvdən əvvəl hər bir məhkumla fərdi söhbətlər aparılır. Ağır cinayət törətməsinə rəğmən səhhətində problem olduğu üçün o şəxsə əfv düşürdü. Amma o, bundan könüllü imtina etdi. Çünki deyirdi ki, "çıxsam yenə bura qayıdacam”.
Qeyd edək ki, Prezident İlham Əliyev pandemiya səbəbindən bu il aprelin 6-da məhkum edilmiş şəxslərin əfv olunması barədə sərəncam imzalayıb. Sərəncamla yaşı 65-dən yuxarı olan 176 məhkum azadlığa buraxılıb.
Qaraçuxur qəsəbəsində avtomobilin qarşısını kəsərək sürücünü vurub təhqir edən şəxs barəsində açıqlama verilib.
Bakı Şəhər Dövlət Yol Polisi İdarəsinin bölmə rəisi polis polkovniki Vaqif Əsədov Avtosfer.az-a açıqlamasında bildirib ki, 99-RZ-878 qeydiyyat nişanlı "Mercedes" markalı avtomobillə qaydaları pozaraq sürücünün qarşısını kəsib onu vuran Suraxanı rayon sakini 32-ci bölmənin əməkdaşları tərəfindən saxlanılıb.
Şikayət edən sürücü də 32-ci polis bölməsinə dəvət edilərək hər iki tərəfin izahatları alınıb. Şikayətçinin vurulması iddiası ilə bağlı qərar qəbul olunaraq məhkəmə-tibb ekspertizası da təyin edilib.
Bu məsələ ilə bağlı yekun qərar məhkəmə tərəfindən veriləcək- deyərək Vaqif Əsədov bildirib.
Bakıda küçədən iki günlük qız uşağı tapılıb.
Oxu.az xəbər verir ki, hadisə ötən gün paytaxtın Yasamal rayonunda qeydə alınıb.
Rayonun İkinci Alatava küçəsində yerləşən evlərdən birinin qarşısında iki günlük qız uşağı tapılıb. Körpə hüquq-mühafizə orqanları tərəfindən uşaq evinə təhvil verilib.
Faktla bağlı araşdırma aparılır.
Xəzər rayonunda qardaşı arvadını qətlə yetirməkdə təqsrli bilinən Ələkbər Abdullayevin cinayət işi.
Hadisə 2018-ci il avqust ayında Xəzər rayonunda baş verib.
Rayonun Binə qəsəbəsində Ələkbər Abdullayev qısqanclıq zəmnində qardaşının arvadı Rübabə Abdullayevanı çoxsaylı bıçaq zərbələri ilə qətlə yetirib.
Hadisənin təfərrüatları barədə daha ətraflı videonu təqdim edirik.
Bakının Sabunçu rayonunda dava zamanı iki nəfər bıçaqlanıb.
Apa xəbər verir ki, hadisə Yusif Qasımov küçəsində baş verib.
1990-cı il təvəllüdlü İbayev Əliyar Elşad oğlu 2002-ci il təvəllüdlü Quliyev Ümid Elman oğlu ilə əlbəyaxa dava edib. Dava zamanı Ə.İbayev bıçaqla Ü.Quliyevin qol nahiyəsinə bir neçə bıçaq zərbəsi vurub.
Ü.Quliyev isə bıçaqla Ə.İbayevin ayaq nahiyəsinə bir neçə bıçaq zərbəsi vurub.
Sabunçu Rayon Polis İdarəsində faktla bağlı araşdırma aparılır.
Quba rayonunda qısqanclıq zəmnində həyat yoldaşını qətlə yetirməkdə təqsirli bilinən Murad Ələsgərovun cinayət işi.
Hadisə 2017-ci ilin may ayında Qubada baş verib. Rayonun Güləzi kənd sakini Murad Ələsgərov yaşadığı evin həyətində azyaşlı qızının gözü qarşısında arvadı 29 yaşlı Ulduz Ələsgərovaya əvvəlcə daş parçası, sonra isə balta ilə baş nahiyyəsindən çoxsaylı zərbələr endirərək xüsusi amansızlıqla qətlə yetirib.
Cinayəti törətdikdən sonra Murad Ələsgərov könüllü polisə gələrək təslim olub.
İstintaqla müəyyən olunub ki, Murad Ələsgərov arvadı Ulduzun onlarla bir evdə yaşayan ögey qardaşı Şeyda ilə intim münasibətlərinin olmasında şübhələnərək onu öldürmək qərarına gəlib.
Qeyd edək ki, ailənin birgə nigahdan 3 azyaşlı övladı olub.
Hadisənin təfərrüatları barədə daha ətraflı videonun 13:17-ci dəqiqəsindən baxa bilərsiz.
Bakıda aptekə silahla basqın edilib
Bakı Şəhər Baş Polis İdarəsinin Mətbuat Xidmətindən bildirilib ki, aprelin 21-də axşam saatlarında Sabunçu rayonu, Zabrat qəsəbəsində yerləşən aprektlərdən birinə üzündə maska olan naməlum şəxs əlində tapançaya oxşar alətlə əczaçını hədələməklə 700 manat pulu quldurluq yolu ilə talayıb.
Bakı ŞBPİ Cinayət-Axtarış İdarəsi və 15-ci Polis bölməsi əməkdaşlarının birgə keçirdiyi təxirəsalınmaz əməliyyat-axtarış tədbirləri nəticəsində quldurluq əməlində şübhəli bilinən, Bakı şəhər sakini, əvvəllər Cinayət Məcəlləsinin 234-cü maddəsi ilə məhkum olunan 1979-cü il təvəllüdlü İ.Paşayev müəyyən olunaraq tutulub.
Sabunçu Rayon Polis İdarəsi İstintaq şöbəsində başlayan cinayət işi üzrə, şübhəli şəxs ətrafında əməliyyat-axtarış, əməliyyat-istintaq tədbirləri davam etdirilir.
Masallı rayonunda fərdi yaşayış evində baş verən partlayışda 2 nəfər vəfat edib.
"Report" xəbər verir ki, hadisə aprelin 16-da saat 07 radələrində rayonun Təzə Alvadı kənd ərazisində qeydə alınıb.
Belə ki, kənd sakini İntiqam Qədiyevə məxsus fərdi yaşayış evində partlayış zamanı ev bütövlükdə dağılıb. Nəticədə İ.Qədiyev, arvadı Sevinc Qədiyeva, övladı Rüfanə Qədiyeva, Cahid Qədiyev və Zəhra Qədiyeva ağır xəsarətlər alıblar. Ümumilikdə xəsarət alan 5 nəfər Bakı şəhərində yerləşən 5 saylı şəhər kliniki xəstəxanasına göndərilib.
İlkin ehtimala görə, partlayışa səbəb qazsızma olub.
Faktla bağlı Masallı rayon prokurorluğunda Cinayət Məcəlləsinin 314.2-ci (səhlənkarlıq, ehtiyatsızlıqdan ağır nəticələrə səbəb olduqda) maddəsi ilə cinayət işi başlanıb.
Daha sonra İ.Qədiyev və arvadı S.Qədiyeva müalicə aldıqları xəstəxanda ölüblər.
Fakta görə Cinayət Məcəlləsinin 314.2-ci (səhlənkarlıq, ehtiyatsızlıqdan ağır nəticələrə səbəb olduqda) maddəsi ilə başlanılan cinayət işi 314.3.cü maddəyə tövsif edilib.
R.Aşurova hadisə barədə Daxili İşlər Nazirliyinin (DİN) "102 Zəng Mərkəzi" xidmətinə şikayət edib
Vətəndaş polisdən şikayətçidir. Bu barədə "Report"a Rasim Aşurov danışıb. O bildirib ki, bu gün Bakının İzmir küçəsində diş həkimindən evə piyada qayıdan zaman onu və bacısı Dinarə Aşurovanı Yasamal Rayon Polis İdarəsinin 27-ci Polis Bölməsinin polis nəfəri Fərid Sultanlı saxlayıb: "Diş klinikasından çölə çıxan zaman polis əməkdaşı bizi saxladı. Hər ikimizdə rəsmi icazə sənədi var idi. Lakin bu gün şənbə olduğu üçün bacımın iş günü deyildi. Amma sistemdə icazə göstərilib. Dinarə Aşurova isə 8103-ə SMS göndərməmişdi. Polis əməkdaşı bildirdi ki, bacım cərimə olunacaq. Biz də razılaşdıq. Lakin polis əməkdaşı qeyd elədi ki, biz cəriməni indi ödəməliyik. Yəni poçtda gedərək cərimənin ödənilməsini tələb etdi. Mən yerindəcə ödənilmənin olmadığını ona desəm də, razılaşmadı, işin məhkəməyə gedəcəyini söylədi və protokol tərtib etdi. Sonra bizi öz avtomobilinə mindirərək yaxınlıqdakı poçta apardı. Biz məcbur olaraq poçtda 100 manat cəriməni ödədik. Hətta biz poçta daxil olanda orada çalışan xanım zarafatla polisə bildirdi ki, "bu qədər şəxsləri cərimələmək üçün haradan tapırsan?" Mən həmin xanımın danışığından belə başa düşdüm ki, bizdən əvvəl bir neçə şəxsi də cərimələyib və bu qayda ilə poçta aparır".
R.Aşurov söyləyib ki, hadisə barədə Daxili İşlər Nazirliyinin (DİN) "102 Zəng Mərkəzi" xidmətinə şikayət edib.
Abşeron sakinində silah-sursat aşkarlanıb.
Bu barədə Yenisabah.az-a Daxili İşlər Nazirliyinin (DİN) Mətbuat Xidməti məlumat verib.
Belə ki, DİN Baş Mütəşəkkil Cinayətkarlıqla Mübarizə İdarəsi (“Bandotdel”) əməkdaşlarının daxil olan məlumat əsasında Abşeron rayonu Masazır kəndində yaşayan əvvəllər məhkum olunmuş S.Əliyevin evində keçirdikləri əməliyyat-axtarış tədbirləri nəticəsində oradan 1 ədəd “BM” markalı tüfəng, 130 ədəd müxtəlif çaplı patron, 1 ədəd ov bıçağı və 14 qramdan artıq marixuana aşkar edilərək götürülüb.
Faktla bağlı araşdırma aparılır.