 |
|
Sosial şəbəkələrdə kiberdələduzluq edən şəxs saxlanılıb.
“Qafqazinfo” xəbər verir ki, polisin İsmayıllıda keçirdiyi tədbirlərlə sosial şəbəkədə qazanc əldə etmək adı ilə vətəndaşı aldadaraq pulunu ələ keçirən 30 yaşlı Ceyhun Məmmədov saxlanılıb.
Bildirilib ki, o, instaqramda “medine.invest” adlı səhifə yaradaraq müraciət edən şəxslərə kiçik yatırımlarla daha çox qazanc əldə etmək kimi şirnikləndirici vədlər verib. C.Məmmədov barəsində cinayət işi başlanılıb, araşdırma aparılır.
Qeyd edək ki, polis dəfələrlə vətəndaşlara müraciət edərək sosial şəbəkələrdə qarşılaşdıqları və iqtisadi əsaslara söykənməyən piramida dələduzluq sxemlərinə, həmçinin yatırım adı altında şişirdilmiş qazanc vəd edən elanlara inanmamağa çağırıb.
Azərbaycan və xarici şirkətlərin kompüter sistemlərinə qanunsuz daxilolmada, mobil telefonlara və digər texniki avadanlıqlara kənardan nüfuz edən proqramlar yaratmada və digər kibercinayətlərdə təqsirləndirilən "Zeromap” MMC-nin icraçı direktoru olan Tural Əliyevin cinayət işi üzrə məhkəmə prosesi keçirilib.
"Report" məlumatına görə, Yasamal rayon Məhkəməsində hakim Rəşad Cavadzadənin sədrliyi ilə keçirilən prosesdə şahidlər ifadə verib.
Belə ki, ifadə verənlərdən biri də "İdrak" şirkətinin prezidenti “Zeromap” MMC-nin təsisçisi Hikmət Abdullayev olub.
O deyib ki, şirkəti serverlərin təhlükəsizliyi ilə məşğuldur. Şahidin sözlərinə görə, təqsirləndirilən şəxslə 2021-ci ildə tanış olub.
"Tural bir adamla gəldi. Dedilər ki, savadlı oğlandır. Bir az söhbət etdik, bacarıqlı insan olduğunu anladım. Mən ona dedim ki, özünü doğrultmaq üçün fürsət verə bilərəm, amma səni hələki işə götürməyəcəm. Ona məni serverlərdəki boşluqların maraqlandırdığını dedim. Bu boşluqları tapdığı təqdirdə dövlət orqanlarına məsələ ilə bağlı məlumat verdikdən və bu qurumların mütəxəssislərindən icazə aldıqdan sonra işləyə biləcəyimizi bildirdim", - şahid deyib.
Hikmət Abdullayevin sözlərinə görə, təqsirləndirilən şəxsə məsələ ilə bağlı şirkət yaratmağı təklif edib və buna görə də ona 80 min manat pul verib:
"Mən ona dedim ki, sən şirkəti yarat, rəhbəri olduğum İdrak şirkəti də sənin təhlükəsizliyini təmin edəcək. Belə də razılaşdıq. Bir müddət sonra DTX əməkdaşları məni hava limanında qarşıladı, istintaqa dəvət etdi. Daha sonra Turalın belə səhvlər etdiyini öyrəndim".
Hakim şahiddən tanımadığı adama niyə birdən-birə 80 min manat pul verdiyini soruşub.
Şahid Hikmət Abdullayev cavabında bildirib ki, Tural Əliyevin üzərində işlədiyi məsələ serverlərin təhlükəsizliyi üçün vacib olub:
"Mənim ondan istədiyim müdafiə sistemi idi. Əgər Tural xarici şirkətlərin serverlərində boşluqlar tapacaqdısa, biz o boşluqları bağlamaq üçün həmin şirkətlərə müraciət edəcəkdik".
Proses zamanı hakim şahid Hikmət Abdullayevin ibtidai istintaqa verdiyi ifadəsini də elan edib. O, həmin ifadəsində deyib ki, Tural Əliyev ona Azərbaycanın iki şirkətinin və xarici şirkətin informasiya sisteminə daxil olduğunu deyib. O da bununla bağlı təqsirləndirilən şəxsə iradını bildirib.
Prosesdə ifadə verən digər şahid E.Abdullayevin sözlərinə görə, təqsirləndirilən şəxsi internetdə tanıyıb.
"Turalın işlədiyi sahə üzrə təhsil alırdım. Tural mənə xarici şirkətlərin serverlərinə daxil olduğunu demişdi. Lakin hansı şirkətlər olduğu yadımda deyil".
Sonra şahidin ibtidai istintaqa verdiyi ifadəsi elan olunub. O, sözügedən ifadəsində deyib ki, Tural Əliyevin zərərverici proqramlara marağı olub:
"Tural özü də bəzən zərərverici proqramlardan istifadə edirdi. O, mənə xarici şirkətlərlə yanaşı, "Ulduz" və "Ultra" adlı yerli şirkətlərin serverlərinə də daxil olduğunu demişdi".
Müttəhim Tural Əliyev şahidin ibtidai istintaqa verdiyi ifadəsinə münasibət bildirib. O, "Ultra" şirkətinin serverinə daxil olduğunu, “Ulduz" şirkətinin serverinə daxil olmadığını və bu məsələ ilə bağlı özünü qismən təqsirli bildiyini deyib.
Məhkəmə prosesi aprelin 17-də davam etdiriləcək.
İttihama görə, “Zeromap” MMC-nin icraçı direktoru olan Tural Əliyev 2021-2024-cü illərdə fiziki və hüquqi şəxslərin mobil telefonlarına və digər texniki avadanlıqlara kənardan nüfuz edə bilən casus proqramları əldə edib tətbiqə daxil olub.
Bundan başqa Tural Əliyev xarici ölkələrin şirkətlərinə məxsus hamıya açıq olmayan məlumatlara giriş edərək kiberhücumlar təşkil edib.
Tural Əliyevə Dövlət Təhlükəsizliyi Xidmətinin İstintaq baş idarəsi tərəfindən Azərbaycan Respublikasının Cinayət Məcəlləsinin 271.2.1 (kompüter sisteminə qanunsuz daxil olma), 272.2.1 (kompüter məlumatlarını qanunsuz ələ keçirmə) və 273-1.1-ci (kibercinayətlə
O, Azərbaycanda “qəddar qatil”, Ermənistanda isə “satqın xain” kimi tanınır
Ötən şənbə günü İrəvandakı Azadlıq meydanında Qarabağdan köçüb gələn ermənilərin mitinqi keçirilib. Mitinqin sonlarına yaxın ərazidə qondarma “artsax təhlükəsizlik şurasının keçmiş katibi”, Xocalı qatili Vitali Balasanyan da gözə dəyib.
Modern.az “Hraparak”a istinadən xəbər verir ki, mitinq iştirakçıları V.Balasanyandan “artsax”ın süqutu ərərfəsində azərbaycanlılarla hansı danışıqlar apardığına aydınlıq gətirməsi üçün izahat tələb ediblər.
“Hraparak” xatırladıb ki, 44 günlük müharibədən sonra Rusiya sülhməramlı komandanlığı ilə isti münasibətdə olan V.Balasanyan azərbaycanlılarla danışıqlara cəlb olunub. Qarabağ erməniləri Balasanyanı müharibədən iki il sonra Fərrux yüksəkliyini təhvil verməkdə ittiham edirdi. Balasanyan deyib ki, bu məsələ ilə heç bir əlaqəsi yoxdur və ittihamların ünvanı o deyil.
Xocalı qatilinin sözlərinə görə, “qoşunların” Fərruxdan çıxarılması barədə göstərişi o deyil, “artsax ordusunun komandanı” Kamo Vardanyan verib.
V.Balasanyan terroru sevən, türklərin düşməni olan və həddindən artıq qəddar erməni zabiti kimi ad çıxarıb. O, Xocalı qətliamını törədənlərdən biridir.
Azərbaycan Ordusu 2023-cü ilin sentyabrında Qarabağda separatçılara qarşı antiterror əməliyyatları keçirəndə Balasanyan Əsgəranda gizlənmişdi. Sentyabrın 28-də isə o, Qarabağı tərk edərək gizli yollarla Ermənistana qaçıb.
Ermənistan mətbuatı onun dağ yolları ilə qaçmağa müvəffəq olduğu barədə məlumat yayıb. İddiaya görə, Balasanyan gizli dağ yolları ilə piyada getdiyinə görə Ermənistana yalnız oktyabrın ilk ongünlüyündə çata bilib.
“Yeni Musavat” bu informasiyaya əlavə olaraq bildirir ki, Balasanyan qəhrəman həmvətənimiz Natiq Qasımovun əsir götürüldükdən sonra dindirilməsi prosesində də iştirak edib. Həmin dindirilmədən çəkilmiş şəkillərdə mərkəzdə oturmuş gənc zabitin Vitali Balasanyan olduğu eynəksiz, lupasız da aydın görünür.
Ancaq V.Balasanyan sonradan bu şəkili ona göstərərək Natiq Qasımovun taleyi barədə soruşan italyan jurnalistə “şəkildəki mən deyiləm”, - deyə həyasızcasına yalan söyləmişdi. Bu şəxs Natiq Qasımovun başına nə gəldiyini bilən azsaylı hərbi vəzifəlilərdən biridir.
Astara rayonu ərazisində qaçaqmalçılıq yolu ilə ölkəyə pilotsuz uçuş aparatı vasitəsilə keçirilən 10 kiloqram marixuana çay kənarında aşkarlanıb.
“Qafqazinfo” xəbər verir ki, Astara RPŞ-nin əməkdaşları tərəfindən PUA ilə yerə qoyularaq lokasiyasiyası ötürülən şübhəli bağlamaları həmin yerdən götürməyə gələn, əvvəllər məhkum olunmuş 37 yaşlı Cavid Həsənov saxlanılıb. Müəyyən edilib ki, narkotik vasitəni başqa-başqa ünvalara çatdırılmasına məsul olan şübhəli şəxsin istintaqla araşdırılan İran vətəndaşı ilə anlaşması olub.
Faktla bağlı cinayət işi başlanılıb, şübhəli şəxs barəsində həbs qətimkan tədbiri seçilib. İstintaq hərəkətləri davam etdirilir.
Səfərbərlik və Hərbi Xidmətə Çağırış üzrə Dövlət Xidmətinin Goranboy Rayon Şöbəsinin əməkdaşı həbs edilib.
“Qafqazinfo”nun əldə etdiyi məlumata görə, 1991-ci il təvəllüdlü Orxan Məmmədova aprelin 1-də rayon məhkəməsinin qərarı ilə 6 sutkalıq həbs verilib.
Şöbədə mütəxəssis vəzifəsində çalışan Orxan İnzibati Xətalar Məcəlləsinin 510-cu (Xırda xuliqanlıq) maddəsi ilə təqsirli bilinib.
İnzibati xəta haqqında protokol araşdırılarkən məlum olub ki, dövlət qurumunun Goranboy şöbəsinin rəisi Elxan Feyziyev Orxanın vəzifəsinin dəyişdirilməsi və otağının boşaldılmasına göstəriş verib. Bundan narazı qalan işçi şöbə rəisinin otağına gedərək məsələni aydınlaşdırmaq istəyib və vəzifəsinin dəyişdirilməsinə dair yazılı əmrin təqdim edilməsini tələb edib.
Bu zaman şöbə rəisi ilə əməkdaş arasında dava-dalaş düşüb. Davanı idarənin digər əməkdaşları rəisin otağına daxil olaraq sakitləşdiriblər.
Bundan sonra Orxan barəsində polisə şikayət edilib və onun cəzalandırılması tələb olunub.
Hadisə ilə əlaqədar Səfərbərlik və Hərbi Xidmətə Çağırış üzrə Dövlət Xidmətinin də mövqeyini öyrəndik. Qurumun İctimaiyyətlə İş və Beynəlxalq Əlaqələr şöbəsinin rəisi Pərviz Sədrəddinov “Qafqazinfo”nun sorğusuna cavab olaraq faktı təsdiq etdi: “Baş vermiş hadisə ilə bağlı hazırda daxili araşdırma aparılır və araşdırmanın nəticəsində yekun qərar veriləcək”.
Ağdərə rayonunun Baş Güney kəndi ərazisində insana məxsus olduğu ehtimal edilən skelet fraqmentləri aşkarlanıb.
"Report" xəbər verir ki, qalıqların Əsəddin Curu oğlu Novruzov və Qurban Ramazan oğlu Göyüşova məxsus olduğu ehtimal edilir.
Bildirilib ki, qalıqlar həmin şəxslərin 1992-ci il martın 12-də şəhid olduqdan sonra yaxınlarının qoyub getdikləri yerdə tapılıb.
Artıq qalıqlar ərazidən götürülərək şəxsiyyətlərinin müəyyənləşdirilməsi üçün ekspertizaya göndərilib.
Kənd Təsərrüfatı Nazirliyi yanında Aqrar Xidmətlər Agentliyində əməliyyat keçirilib.
"Report"un əldə etdiyi məlumata görə, Baş Prokuror yanında Korrupsiyaya qarşı Mübarizə Baş İdarəsi tərəfindən keçirilən əməliyyat zamanı bir neçə vəzifəli şəxsin saxlanıldığı bildirilir.
Aprel ərzində Yer kürəsində bir neçə geomaqnit qasırğası proqnozlaşdırılır.
Bu qasırğaların bəzi günlərdə meteohəssas insanlara və texnoloji sistemlərə təsir göstərə biləcəyi bildirilir.
İlk maqnit qasırğası aprelin 5-də baş verəcək və G3 səviyyəli, yəni 5 ballıq gücə malik olacaq.
Bu qasırğa avadanlıqların işinə təsir edə bilər və meteohəssas insanlar üçün ciddi stresslə nəticələnə bilər.
Aprelin 6 və 7-də maqnit aktivliyi azalacaq.
Maqnit qasırğaları zamanı meteohəssas insanlar baş ağrısı, yorğunluq, yuxusuzluq və digər narahatlıqlar hiss edə bilərlər. Belə günlərdə fiziki və emosional yüklənmədən qaçmaq, düzgün qidalanmaq və kifayət qədər istirahət etmək məsləhət görülür.
Məşhur cips brendi “Ruffles”ın məhsulları bazardan təcili şəkildə yığışdırılır.
Xarici KİV xəbər verir ki, bu barədə Qida Standartları Agentliyi (FSA) məlumat yayıb.
Məhsulun həyati baxımdan təhlükəli olduğu üçün yığışdırıldığı bildirilib.
Məlum olub ki, “3D Trading” şirkəti tərəfindən satılan “Ruffles Sabor a Jamón Crisps” çiplərinin allergen tərkibi ingilis dilində göstərilməyib.
Bu çipslərin tərkibində süd və soya var, lakin bu məlumat qablaşdırmada yer almadığından, allergiyası olan insanlar üçün ciddi sağlamlıq riski yaradır.
Cipsin 150 qramlıq paketlərdə olan bütün tarixlər üzrə bütün partiyaları Şimali İrlandiya və Şotlandiyada yığışdırılıb.
İstehlakçılar hətta qəbz təqdim etmədən də məhsulu aldıqları mağazaya qaytarmaqla pulunu tam şəkildə geri ala bilərlər. “Anaphylaxis UK” süd və soya allergiyası olan şəxslərə xəbərdarlıq edib. Allergik reaksiyalar yüngül səpgidən həyati təhlükə yaradan anafilaksiyaya qədər dəyişə bilər.
Ciddi simptomlara aşağıdakılar daxildir: Boğazda, dildə və ya tənəffüs yollarında şişkinlik, nəfəs almaqda çətinlik, xırıltılı nəfəs, baş gicəllənməsi, zəiflik hissi, solğun, nəmli dəri və huşunu itirmə.
Mətbuat Şurası “Kanal S”də baş verənləri pisləyib.
Şuradan Ölkə.az-a bildirilib ki, son dövrlər Azərbaycanın televiziya məkanında efir mədəniyyətinə riayət edilməməsi, ayrı-ayrı teleaparıcıların, veriliş iştirakçılarının etik qaydaları və ümumi normaları pozması halları artıb.
Qeyd edilib ki, "Kanal S” telekanalının yayımında yaşananlar da bu baxımdan diqqət çəkməkdədir: "Telekanalda veriliş aparıcısı olan hər bir şəxs jurnalist statusundadır. Jurnalist isə iddialı danışıq tərzindən uzaq durmalı, səsinin tonunu yüksəltməməli, mimika və jestikulyasiyalarına diqqət yetirməli, konkretliyi qorumalı, qıcıqlandırıcı ifadələr işlətməməli, aşırı şəxsi mövqe və fikir nümayişindən çəkinməli, müsahiblərinə, çağrılmış qonaqlara hörmət və nəzakətlə yanaşmalı, onlara münasibətdə qınayıcı, linçedici mövqe tutmamalıdır".
"Aparıcı-jurnalist nəzərə almalıdır ki, istənilən mövzudakı müzakirəni adi məişət səviyyəsinə endirmək, bayağılaşdırmaq eybəcər mənzərə və efir kirliliyi doğurur. Bu isə media peşəkarlığına tamamilə ziddir. Təəssüf ki, “Kanal S”in aparıcısı Nigar Fərhadın təqdimatında vurğuladığımız cəhətlər qətiyyən nəzərə alınmadı. O, özünün yolverilməz tərzi, ümumi dəyərlərə zidd davranış ilə geniş ictimaiyyətin narazılığına, hətta qəzəb və hiddətinə səbəb oldu.
Bütün bunları nəzərə alan Azərbaycan Mətbuat Şurasının Etika Komissiyası “Kanal S” telekanalının efirində yaşananlardan həm təəssüfləndiyini bildirir, həm də baş verənləri qətiyyətlə pisləyir. Komissiya bu qənaətdədir ki, sözügedən telekanalın rəhbərliyi belə xoşagəlməzliklərin qarşısını almalı, yolverilməz təqdimatların gələcəkdə təkrarlanmaması üçün təxirəsalınmaz tədbirlər görməlidir"- Şuradan bildirilib..
Həmçinin vurğulanıb ki, Komissiya, ümumən Azərbaycan teleməkanına məsul şəxsləri ictimai maraq və mənafelərin müdafiəsinin vacibliyi prinsipini rəhbər tutaraq, aparıcı seçimi, ekran etikası və efir məsuliyyəti məsələlərinə həssas yanaşmağa, sensasiya xatirinə əxlaq və davranış qaydalarının heçə sayılması təmayüllərinə, mənəvi dəyərlərdən uzaq hərəkətlərin adiləşməsinə, habelə cəmiyyətin axarına və dinc yaşam nornalarına qarşı təhdid mahiyyəti daşıyan hallara biganə qalmamağa çağırır.