Qərb Bakı ilə İrəvan arasında münasibətlərin normallaşdırılması və sülh danışıqlarının bərpası istiqamətində yenidən vasitəçilik missiyasını aktivləşdirməkdədir və bu məqsədlə yaxın günlərdə Ermənistan və Azərbaycan liderləri arasında həftəsonu Brüsseldə növbəti görüş planlaşdırılır.

Bu barədə “Financial Times” qəzeti görüşə hazırlıqla tanış olan üç rəsmiyə istinadən yazıb.

Nəşrin yazdığına görə, Avropa İttifaqı Şurasının prezidenti Şarl Mişel bazar günü Ermənistanın baş naziri Nikol Paşinyan və Azərbaycan Prezidenti İlham Əliyevlə görüşəcək.

Bu, fevralda Münhendəki danışıqlardan və keçən həftə iki ölkənin xarici işlər nazirləri arasında Vaşinqtonda keçirilən geniş müzakirələrdən sonra iki lider arasında ilk təkbətək görüş olacaq.

Üç liderin həmçinin iyunun 1-də Moldovada Avropa Siyasi Birliyinin sammiti çərçivəsində Almaniya kansleri Olaf Şolts və Fransa prezidenti Emmanuel Makron ilə daha bir görüş keçirməsi planlaşdırılır.

Nəşrin məlumatına görə, danışıqlarda yəqin ki, Azərbaycan tərəfindən Laçın yolunda sərhəd-keçid məntəqəsinin yaradılması məsələsi də müzakirə olunacaq, həmçinin sərhədlərin demarkasiyası, əsirlərin mübadiləsi və digər mövzular müzakirə olunacaq.

Twitter