Prezident hər zaman ölkədə baş verən istənilən hadisəyə çevik reaksiya verir və dərhal günahkarları cəzalandırır.

Bunu Axar.az-a İlham Əliyevin ölkənin enerji sistemindəki vəziyyətlə əlaqədar keçirdiyi müşavirədəki çıxışına münasibət bildirən Milli Məclisin İctimai birliklər və dini qurumlar komitəsinin sədri, YAP İcra katibinin müavini Siyavuş Novruzov deyib. Millət vəkili ölkə rəhbəri İlham Əliyevin ötən gün ölkənin enerji sistemindəki vəziyyətlə bağlı keçirdiyi müşavirəni yüksək qiymətləndirib:

“Prezident hər zaman ölkədə baş verən istənilən hadisəyə çevik reaksiya verir və dərhal günahkarları cəzalandırır. Bildiyiniz kimi, Mingəçevir İES-da baş verən qəzanın aradan qaldırılması istiqamətində yaradılan Dövlət Komissiyası hazırda fəaliyyətini davam etdirir. Komissiyanın əsas vəzifələrindən biri bu məsələni araşdırmaq və qəzanın səbəblərini aşkar etməkdir. Mingəçevir İES-da baş vermiş qəzanın təxribat və ya terror olmasına gəlincə, hesab edirəm ki, bu barədə Dövlət Komissiyası tərəfindən aparılan bütün işlər yekunlaşdıqdan sonra konkret fikir yürütmək olar”.

S.Novruzov son illər ərzində Azərbaycanın enerji sektoruna çox böyük investisiyaların qoyulduğunu vurğulayıb:

“Son 15 il ərzində Azərbaycanda onlarla yeni elektrik stansiyası istifadəyə verilib. Enerji potensialımız hazırda 6400 meqavata bərabərdir. Mingəçevir də daxil olmaqla, demək olar ki, digər bölgələrdə modul tipli İES-lər fəaliyyət göstərir. Bakı, Sumqayıt, Şirvan şəhərlərində, Astara, Xaçmaz, Şəki, Quba rayonlarında, eyni zamanda, bölgələrdə su elektrik stansiyaları yaradılıb. Bundan başqa, Sumqayıtda da energetika sahəsi üzrə istehsal müəssisələri fəaliyyət göstərir. Cənab prezident bu sahəyə hər zaman xüsusi qayğı göstərib, bundan sonra da göstərəcək”.

Twitter