Ermənistanın ikinci prezidenti Robert Köçəryanın həbsi ölkədə yeni müxalif qütbün formalaşmasına gətirib çıxaracaq.

Axar.az xəbər verir ki, bunu jurnalistlərə açıqlamasında erməni politoloq Vigen Akopyan deyib.

“Artıq ölkədə müxalif qüvvə yox, qütb formalaşır. Belə ki, bu gün Respublikaçı və Daşnaksütyun partiyaları istisna olmaqla, bütün partiyalar indiki hökumətin mövqeyini ya qismən, ya da tam dəstəkləyirlər. Bununla da Respublikaçı və Daşnaksütyun partiyaları yeni müxalifət yarada bilərlər. Bütün proseslər isə Köçəryanın həbsinin ətrafında gedir. Köçəryan İrəvana qayıdan zaman həbs ediləcəyini böyük ehtimalla bilirdi. Onun bu qərarına bir neçə faktor təsir edib. Belə ki, ya eks-prezidentə toxunulmazlıqla bağlı xarici və daxili zəmanətlər verilib, ya da ki, o, böyük siyasətə qayıtmaq qərarına gəlib. Bu işdə ona əsas dəstək Respublikaçı Partiyasından gələcək və böyük ehtimalla gələcəkdə buna Daşnaksütyun Partiyası da qoşulacaq. Köçəryanla adı birlikdə çəkilən digər partiya - Çiçəklənən Ermənistan isə hələlik gözləmə mövqeyindədir. Ola bilsin ki, bu partiya xarici səfirliklərin Köçəryanın həbsi ilə bağlı reaksiyalarını gözləyir. Bu reaksiyalardan sonra partiya özünün gələcək fəaliyyətini müəyyən edəcək”, - Akopyan bildirib.

Twitter