Britaniya hökuməti hərbi xərclərini cari ildə əlavə 1 milyard dollar artırmağı planlaşdırır.

Axar.az xəbər verir ki, bu barədə məlumatı Britaniyanın “Tayms” qəzeti yayıb.

“Britaniya Müdafiə naziri Qevin Uilyamson müdafiə xərclərinin artırılması uğrunda mübarizə aparır. Hazırda nazirlik yeni hərbi təyyarələr, peyklər, gəmilərin alışına maneə yaradan illik 2,5 milyardlıq büdcə defisitinin öhdəsindən gəlməyə çalışır. Artıq Britaniya Nümayəndələr Palatası müdafiə xərclərinin ümumdaxili məhsulun 2% həcmindən 3%-nə qədər artırılmasına izn verib. Yəni bununla müdafiə xərclərinin illik 25,9 milyard dollar edilməsi planlaşdırılıb. Amma Müdafiə Nazirliyi hökumətin ayırdığı 1 milyard dollarla razılaşmır və əlavə 5 milyard dolların ordunun hesabına keçirilməsini tələb edir”, – deyə qəzet bildirib.

“Tayms” müdafiə xərclərinin artırılmasına parlamentdəki Konservatorlar Partiyasının üzvləri arasında yaranan narazılığın təsir etdiyini bildirib:

“Təxminən 50 deputat payızda hökumətin qərarına qarşı çıxmağa hazırlaşır. Belə ki, onlar Müdafiə Nazirliyinin əlavə yardımın edilməsiylə bağlı təklifinin dəstəklənməsini istəyirlər”.

Twitter