“Şərq-2018” hərbi təlimi sentyabrın 11-dən 15-nə qədər keçiriləcək.

Axar.az xəbər verir ki, bunu jurnalistlərə açıqlamasında Rusiya Müdafiə naziri Sergey Şoyqu deyib. Onun sözlərinə görə, bu təlim 1981-ci ildən bu yana Rusiyada keçirilən ən böyük təlim olacaq.

O, təlimdə 300 min hərbçi, 36 min tank, ZTR və digər hərbi avtomobillərin, 1000-dən çox vertolyot, təyyarə və pilotsuz uçan aparatın iştirak edəcəyini bildirib:

“Bu təlim müəyyən qədər “Qərb-81” təlimini təkrarlayır, amma ondan daha miqyaslıdır. Təlimlər Rusiyanın Mərkəzi və Şərq Hərbi dairələrinin bütün poliqonlarında keçiriləcək. Sakit okean və Şimal donanması da təlimə cəlb ediləcək”.

Qeyd edək ki, “Qərb-81” təlimi 1981-ci ilin sentyabrında Belarus, Baltikyanı və Ukraynada baş tutub. Təlimə SSRİ ordusu ilə bərabər, o zaman Lex Valensanın rəhbərliyi ilə genişmiqyaslı aksiyaların keçirildiyi Polşa Xalq Respublikasnın da ordusu qoşulub. Məhz bu təlimdən 3 ay sonra Polşada hərbi vəziyyət tətbiq edilmişdi. Nəticədə hökumətin rəhbərliyinə Müdafiə naziri Voytsex Yaruzelski gətirilmişdi. İllər sonra mətbuata açıqlama verən Yaruzelski məhz bunun sayəsində 1981-ci ildə SSRİ ordusunun Polşaya müdaxiləsinin qarşısını aldığını bildirmişdi.

Twitter