Paşinyan hazırkı siyasi gedişləri ilə mövcud güclərin qarşısında tab gətirə bilməyəcək.

Bu sözləri Axar.az-a açıqlamasında millət vəkili Elman Məmmədov deyib. Deputat bildirib ki, Ermənistan müstəqil dövlət deyil və bu gün də kənardan idarə olunur:

“Ermənistanı idarə edən güclü dövlətlər var. Bu güclər Rusiya və Paşinyanın hakimiyyətə gəlməsinə şərait yaradan Qərbdir. Məhz bunun nəticəsidir ki, bu gün işğalçı ölkədə açıq şəkildə ikihakimiyyətlilik hökm sürür. Ermənistanda hökm sürən hazırkı qeyri-müəyyənliyin əsas səbəbi Rusiyadan uzaqlaşmaq xəttini tutan Paşinyanın Qərb tərəfindən tam qəbul olunmamasıdır. Fikir verin, Qərb Paşinyanı hakimiyyətə gətirsə də, seçkilərə görə Ermənistana maliyyə yardımı ayırmağa tələsmir. Çünki o, “Qərbin adamı” imicini doğrultmur və verdiyi vədləri heç cür yerinə yetirə bilmir. Paşinyan yalnız hakimiyyətini qoruyub saxlamaq barədə düşünür, bunun üçün də müxtəlif vasitələrə əl atır, yəni Sərkisyan və Köçəryanın yolunu gedir. Məsələn, Nikolun oğlunu Qarabağda xidmətə göndərməsi bu qəbildən olan addımlardan sadəcə biridir. Zənnimcə, Paşinyan hazırkı siyasi gedişləri ilə mövcud güclərin qarşısında tab gətirə bilməyəcək”.

Paşinyanın siyasətinin Moskva tərəfindən ciddi izlənildiyini deyən millət vəkili hesab edir ki, Rusiya Ermənistanda yaranmış bu durumdan maksimum istifadə etməyə çalışacaq:

“Artıq Ermənistanda Paşinyana qarşı geniş koalisiya formalaşdırılıb. Təbii ki, bu prosesə də birbaşa Rusiya nəzarət edir. Köçəryan-Sərkisyan bloku 20 ildən çoxdur ki, Ermənistanda kök salıb, üstəlik onların ətrafı mülki və hərbi sferada çox güclüdür. Görünən odur ki, Rusiya bu gün onların tərəfindədir. Əslində, Köçəryanın arxasınca Serj Sərkisyan həbs olunmalı idi. Ancaq bu baş vermədi. Çünki Köçəryanın həbsdən azad edilməsi antipaşinyan prosesinin tərkib hissəsidir. Paşinyanın “korrupsiyaya qarşı mübarizə” bəhanəsi ilə başlatdığı bu proses Moskvanın əli və daxildəki rıçaqların köməyi ilə dayandırıldı. Çünki Nikolun bu siyasi gedişləri uzaqgörənliklə planlaşdırılmayıb, daha çox, qisasçılıq məqsədi daşıyır və Moskvanı qıcıqlandırır. Köçəryanın siyasətə qayıtması da təsadüfi deyil. Onu dəstəkləyən müəyyən qüvvələr, partiyalar var. Bütün bunları nəzərə aldıqda, parlament seçkilərinin Paşinyanın xeyrinə nəticələnəcəyi sual altında qalır. Paşinyan Konstitusiya dəyişikliyinə nail olsa belə, seçkilərdə çoxluq qazanması şübhəlidir. O, indidən Respublikaçılar Partiyasının ciddi müqaviməti ilə üzləşəcəyini bilir, buna görə də ciddi təşviş içərisindədir”.

Twitter