Rusiyalı publisist və “Açıq Rusiya” hərəkatının koordinatoru Vladimir Kara-Murza keçən həftə vəfat edən ABŞ-ın məşhur senatoru Con Makkeynin tabutunu daşıyacaq.

Rusiya mətbuatı bu barədə “Politico” saytının xəbər verdiyini yazıb.

Saytda gedən məlumata görə, amerikalı siyasətçi vaxtilə özü bunu Kara Murzadan xahiş edibmiş. Vladimir Kara Murzanın söylədiyinə görə, Makkeyn ona amansız xəstəliyi barədə şəxsən məlumat verib. Kara Murza xəbəri eşidəndə şoka düşdüyünü, hətta ağladığını bildirib.

Rusiyalı müxlaifətçi ilə amerikalı senator 2010-cu ildən, Moskvanın Bolotnaya meydanındakı etiraz aksiyalarından bu yana tanışdırlar.

Makkeynin tabutu Vladimir Kara Murzadan başqa, ABŞ-ın keçmiş vitse-prezidenti Co Bayden, keçmiş senator Rass Faynqold, keçmiş müdafiə naziri Uilyam Koen və bir neçə dostunun çiyinlərində son mənzilə yola salınacaq. Bunların arasında məşhur aktyor Uorren Bitti də var.

“Politico”nun yazdığına görə, senatorun seçimi birbaşa özünün siyasi düşmənləri saydığı Donald Tramp və Vladimir Putinə son mesajı olub.

Dəfn mərasimi sentyabrın 1-də ABŞ-ın paytaxtı Vaşiqntonda, kilsədə keçiriləcək.

Arizonalı senatorun ailəsi ABŞ prezidenti Donald Trampdan mərasimə gəlməməsini rica edib.

Bunun əvəzində Tramp senatorun ölümü ilə bağlı rəsmi nekroloq yaymağı və Ağ Evin üzərindəki bayrağın yarıya qədər endirilməsini yasaqlayıb. Lakin sonradan, görünür, təzyiqlərdən çəkinərək bu qərarından vaz keçib.

Twitter