Rusiya hökumətinin etiraz doğuran təqaüd şərtləri yumşaldıldı.

Rusiyada hökumətin “pensiya islahatları” adı altında təqaüd yaşının iki il artırılması planı əhalinin narazılığından sonra yarımçıq saxlandı. Rusiya prezidenti Vladimir Putin pensiya islahatının yumşaldacağını bəyan edib. Hakimiyyət qadınlar üçün müəyyən olunan pensiya yaşının qanun layihəsində nəzərdə tutulduğu kimi 63 deyil, 60 yaş olacağını qət edib. Bu barədə Rusiya prezidenti Vladimir Putin əhaliyə ünvanladığı telemüraciətdə bildirib. Vladimir Putinin sözlərinə görə, pensiya yaşı kişilər üçün 63 (əvvəlki layihədə 65), qadınlar üçün isə 60 yaş olaraq müəyyən olunacaq. Rusiya prezidenti söylənilənlərin əksinə, ölkədə pensiya sisteminin sabit qalması üçün büdcədə kifayət qədər vəsait olduğunu deyib.

“Lakin demoqrafik inkişaf sahəsində və əmək bazarında gedən tendensiya, habelə situasiyanın obyektiv analizi göstərir ki, vəziyyət belə davam edə bilməz”,- Putin qeyd edib.

Rusiya prezidentinin sözlərinə görə, dəyişikliklər həm də pensiya ödənişlərinin artırılmasıı zərurətindən irəli gəlib. Bundan başqa, Rusiya prezidenti yaxın iki ildə pensioner olmağa hazırlaşan vətəndaşlara yeni müjdə verib. Belə ki, həmin şəxslər göstərilən vaxtdan 6 ay öncə pensiyaya çıxa biləcəklər.

Onu da qeyd edək ki, siyasi ekspertlər Vladimir Putinin cəmiyyətin təzyiqi ilə geri çəkildiyini söyləyirlər. Həmçinin prezidentin reytinqinin iqtidarda olduğu zaman ərzində ən aşağı səviyyələrə enməsinin də hökumətin güzəştə getməsində böyük rol oynadığı bildirilir.

Üstəlik, müxalif lider Aleksey Navalnının pensiya yaşlarının artırılmasına etiraz olaraq sentyabrın 9-na təyin etdiyi mitinqin də prosesdə əhəmiyyətli təsirinin olduğu söylənir.

Bu hadisədən sonra “Rusiyaya tətbiq edilən iqtisadi sanksiyaların artıq öz təsirlərini göstərməyə,  iqtisadi çətinliklərdən sosial narazılıqları doğurmağa başladığını söyləmək olarmı” sualını aktuallaşdırıb.

Siyasi təhlilçi Əhəd Məmmədli “Yeni Müsavat”a bildirdi ki, Rusiya hakimiyyətinin xalqın xeyrinə geri addım atmasının bir neçə səbəbi və məqsədi var: “Daxili etiraz, narazılıq, iqtisadi sanksiyalar və Putinin sonda müdaxilə etməklə özünü yaxşı, baş nazir Dmitri Medvedevi ”pis oğlan" qismində göstərmək. Ümumilikdə isə Rusiyadakı yaranmış bu situasiya hakimiyyətin əleyhinə, müxalif lider Aleksey Navalnının xeyrinə işlədi. Navalnı bunu öz xeyrinə istifadə edəcək. Xüsusən də təyin edilmiş mitinqdən əvvəl bu qərar cəmiyyətdə hakimiyyətin geri çəkilməsi kimi qiymətləndirilməyə başlanıb. Bu həmdə onu göstərdi ki, Rusiyada ciddi protest elektoratı var və hökumətin çəkindiyi səviyyədə artmaqdadır. Bu elektorat iqtisadi sanksiyalar çoxaldıqca daha da iri miqyas alacaq. Rusiya da güclü orta sinif var və bu zümrə 2011-ci ildən hakimiyyətə əsas müxalifətdir. Narazılar əvvəllər əsasən gənc nəsil idisə, ölkədəki iqtisadi çətinliklərin artması artıq yaşlı nəslin, pensiyaçıların da narazı təbəqəyə çevrilməsi prosesi gedir. Qərbin sanksiyalarının məqsədlərindən biri də Rusiya daxilində iqtisadi vəziyyəti sosial narazılıq həddinə qədər ağırlaşdırmaq idi. Bu məqsədə müəyyən qədər yaxınlaşıblar".

Ekspert hesab edir ki, Rusiyadakı müxalif elektorata kim sahiblənsə, o da Putinə əsas alternativ olacaq: “Hələlik alternativ Navalnı görünür. Amma mən əsas alternativi keçmiş siyasi məhbus mühacir-oliqarx Xodorkovskini görürəm. Lakin bütün variantlarda narazılığın hakimiyyəti dəyişmək qədər güc həddinə çatmadığı müşahidə edilir”.

Twitter