Əgər hökumət Rusiya ilə hər zaman yüksək səviyyəli münasibətlərdən bəhs edirsə, o zaman həqiqətən münasibətlərdə problemlər var.

Axar.az xəbər verir ki, bunu “SputnikErmənistan”a açıqlamasında Ermənistanın eks-prezidenti Robert Köçəryan deyib.

“Normal situasiyada yaxşı münasibətlərdən bu qədər tez-tez bəhs etməyin mənası yoxdur. Mənə elə gəlir ki, Ermənistan hökuməti regiondakı situasiyanı qeyri-adekvat formada dəyərləndirir. Bir tərəfdən bizə dost ölkəyə Qərb tərəfdən sanksiya elan edilib, digər tərəfdən isə düşmənlərimiz daha qeyri-müəyyən olurlar.

Belə bir situasiyada illərdir formalaşmış münasibətləri qırıb, digər güc mərkəzləriylə yeni alyanslar axtarmaq yanlış olardı. NATO ilə münasibətləri inkişaf etdirmək lazımdır, lakin burada iki fikir olmamalıdır. Mən anlamıram ki, Ermənistan hökumətinin Brüsseldəki NATO sammitində iştirakına nə ehtiyac var idi. NATO ilə Rusiya münasibətlərinin sıfır həddinə düşdüyü zamanda NATO dəhlizlərində selfi çəkdirib, tərəfdaşlarımızda suallar yaratmaq uzaqgörənlik deyil. İndi Ermənistan rəhbərliyi situasiyanı anlamağa başlayıb və səhvlərini düzəltmək üçün addımlar atır”, – deyə o bildirib.

Onun sözlərinə görə, Ermənistanda hakimiyyətə gələn şəxslər uzun illər Rusiyaya qarşı çıxış edərək, İrəvanın Avrasiya İttifaqında iştirakına, 102-ci bazanın Gümrüdə olmasına etiraz ediblər:

“Bunları bir günə dəyişməyi təsəvvür etmək çətindir. Əslində hakim komanda da keçmiş fərqli geosiyasi yanaşmaları müdafiə edən şəxslərdən təşkil edilib. Onların demək olar ki, hamısı bu və ya digər yollarla Qərb strukturları və qrantları ilə bağlı olublar.

Sizcə, bu regionda təhlükəsizlik sferasında Rusiyadan çox imkanları olan başqa ölkə varmı? Bu regionda Rusiyadan çox rıçaqları, təsirləri və hərbi imkanları olan ölkə varmı? Artıq mövcud olan münasibtələrdən imtina etmək olmaz. Brüsselə göz dikənlər çox yanılırlar. Əgər bu istiqamətdə hətta çox uzağa hədəflənən niyyətləri olmayıb, sadəcə, qısamüddətli dividentlər qazanmağa cəhd etsələr belə, bu, çox təhlükəlidir.

Türkiyədə baş verənlərə baxın, Azərbaycanın fəaliyyətlərinə və ritorikasına baxın! Ermənistan və Türkiyənin potensialları müqayisəedilməzdir. Bakı hər zaman öz arxasında Ankaranın ciddi dəstəyini hiss edəcək”.

Twitter