Dünyada baş verən proseslər və regionda terrora qarşı aparılan antiterror əməliyyatları Rusiya və Azərbaycanı daha sıx əməkdaşlığa vadar edir.

Bu sözləri Axar.az-a Azərbaycan və Rusiya prezidentlərinin Soçi görüşünün yekununu şərh edən “Baku Netvörk” Ekspert Şurasının rəhbəri, fəlsəfə doktoru Elxan Ələsgərov deyib. Politoloq Azərbaycan və Rusiya münasibətlərinin yeni inkişaf səviyyəsini geosiyasi və regional kontekstdən dəyərləndirib:

“Dünyada baş verən proseslər və regionda terrora qarşı aparılan antiterror əməliyyatları Rusiya və Azərbaycanı daha sıx əməkdaşlığa vadar edir. Azərbaycan prezidentinin Rusiyaya səfəri bir daha təsdiq edir ki, iki ölkə arasında münasibətlərin dünyada gedən proseslərə böyük təsiri var. Məlumdur ki, Gürcüstanda keçirilən seçkilər və Ermənistanda baş verən proseslər regiondakı vəziyyəti kəskin şəkildə dəyişib. Əlbəttə ki, belə vəziyyətdə Rusiya-Azərbaycan əməkdaşlığı gələcəyə dair yeni baxışlar formalaşdırır. Bu gün Azərbaycan üçün bir nömrəli məsələ Dağlıq Qarabağ probleminin həllidir. Ölkəmiz siyasi, iqtisadi və hərbi baxımdan Ermənistanı üstələyir. Bu tendensiya Moskvada diqqətlə izlənilir. Rusiyada da anlayırlar ki, Azərbaycan belə gedişatlar sayəsində Qarabağ məsələsinin həllində Minsk Qrupunun həmsədrlərinin vasitəçiliyindən imtina edə və problemi Ermənistanla təkbaşına həll edə bilər. Hesab edirəm ki, prezidentlərin görüşü bu prosesi nəzarətdə saxlamaq və Qarabağ məsələsində daha da fəallaşmaq baxımından önəmlidir”.

Ekspert Soçi görüşünün iqtisadi əhəmiyyətini də xüsusilə vurğulayıb:

“Azərbaycanın yürütdüyü iqtisadi siyasət nəinki bu gün regionda neft-qaz sahəsində əməkdaşlıqda, həm də Xəzər dənizinin statusu ilə bağlı Konvensiyanın imzalanmasında mühüm töhfələr verib. Bu uğurlu siyasət bu gün də davam etdirilir. Azərbaycanın Rusiya ilə bu çərçivələrdə əməkdaşlığı çox yüksək səviyyədədir. Azərbaycan regional formatlar çərçivəsində də Rusiyanın maraq dairəsindədir. Bunlar Azərbaycan-Türkiyə-Rusiya, Rusiya-Azərbaycan-İran formatlarıdır. Belə bir məqamda Azərbaycan prezidentinin uğurlu Soçi görüşü və yekunda 16 sənədin imzalanması Rusiya ilə münasibətlərin inkişafında növbəti mərhələdən xəbər verir”.

Twitter