İnsanlar arasında keçmişdən yanlış təsəvvür formalaşıb ki, əkin sahələrini yandırmaqla yaranan kül guya torpağa xeyirlidir və gübrə rolunu oynayır.

Əslində təcrübə göstərir ki, əkin sahəsinin yandırılması zamanı torpağın üst qatı kifayət qədər zədələnir, torpağın münbitləşməsinə kömək edən canlı orqanizmlərin hamısı məhv olur.

Bu sözləri Axar.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Tahir Mirkişili əkin sahələrinin yandırılması barədə danışarkən deyib. O bildirib ki, biçindən sonra əkin yerlərinin yandırılması məhsuldarlığa zərərli olmaqla yanaşı, həm də təhlükəlidir:

“Taxıl sahələrində biçindən sonra məhsulun qalıqları iki formada: öz-özünə və gəmiricilər vasitəsilə məhv edilir. Şumlanmış əkin sahələrində əvvəlki mövsümdən qalan taxıl qalıqları gübrə rolunu oynayır. Bütün hallarda əkin sahələrinin yandırılması torpaqların münbitləşməsi cəhətdən müsbət təsirə malik deyil. Həm elmi, həm də texnoloji cəhətdən sübut olunub ki, əkin sahələrinin yandırılması topağın münbitliyinə kifayət qədər ziyandır.

Bundan əlavə, əkin sahələrinin yandırılması ətraf mühitinin qorunması baxımından da təhlükəli hesab olunur. Çünki əkin sahələrində bilərəkdən törədilən yanğınlar həm digər torpaq sahələrinə keçə, həm də meşə yanğınlarına səbəb ola bilər. Fikrimcə, dünyanın əksər ölkələrində yanğınlarla ciddi mübarizə aparıldığı bir vaxtda bu məsələ ilə ciddi məşğul olmaq lazımdır”.

Millət vəkilinin sözlərinə görə, bu tendensiyanı aradan qaldırmaq üçün ilk növbədə əkinçilər arasında ciddi maarifləndirici tədbirlər aparmaq lazımdır:

“Bu gün torpağın məhsuldarlığının artırılması kənd təsərrüfatının qarşısında duran əsas məsələlərdəndir. Azərbaycanda məhsuldarlığın artırılması, yəni hər hektara əkilən məhsuldan daha çox məhsul götürülməsi, bizim kənd təsərrüfatı qarşısında apardığımız islahatların br nömrəli məqsədlərindən biridir. Məhz bu baxımdan torpağın düzgün, vaxtlı-vaxtında becərilməsi çox vacibdir.

Ümumiyyətlə, bu düşüncəni aradan qaldırmaq üçün torpaq sahiblərini maarifləndirmək, əməl etməyənlərlə isə hüquqi formada mübarizə aparmaq lazımdır.

Ölkə prezidentinin təşəbbüsü ilə qanunvericilikdə edilən dəyişikliyə əsasən əkin sahələrinin yandırılmasına görə İnzibati Xətalar Məcəlləsinə yeni cərimə növü əlavə olunub. İXM-nin 244-cü maddəsinə əsasən əkin yerinin yandırılmasına görə fiziki şəxslər dörd yüz manatdan altı yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər beş min manatdan altı min manatadək məbləğdə cərimə edilir”.

Twitter