ABŞ sanksiyalarla əsasən İranın daxili siyasi vəziyyətinə təsir etməyə və İran rəhbərliyini ABŞ-ın tələblərinə qarşı daha yumşaq siyasət yürütməyə vadar etməyə çalışır.

Bu sözləri Axar.az-a açıqlamasında politoloq İlqar Vəlizadə deyib. Ekspert İranın ABŞ-ın addımlarına biganə qalmayacağını və müəyyən kontur addımlar atacağını bildirib:

“Trampın iranlı həmkarı ilə görüşmək təklifi hələ də gündəmdədir. İş orasındadır ki, sanksiyalara görə İranın qarşılaşdığı sosial-iqtisadi çətinliklər fonunda bu təklif Tehran tərəfindən birmənalı qarşılanmır. Düzdür, İran rəhbərliyi Trampın bu təklifini rədd edib. Ancaq İranda bəzi nüfuzlu siyasətçilər Ruhaninin bu addımını tələsik verilmiş qərar hesab edirlər və Trampla görüşün müəyyən məsələləri çözə biləcəyini düşünürlər. Bu da özlüyündə İranda daxili siyasi ab-havanı müəyyən dərəcədə qeyri-stabil edir. Ona görə də ABŞ sanksiyalarla əsasən İranın daxili siyasi vəziyyətinə təsir etməyə və İran rəhbərliyini ABŞ-ın tələblərinə qarşı daha yumşaq siyasət yürütməyə vadar etməyə çalışır. Bu siyasətin nə qədər effektli olacağını söyləmək çox çətindir. Ancaq İran bütün hallarda ABŞ-ın addımlarına biganə qalmayacaq və müəyyən kontur addımlar atacaq. Tehran hazırda Avropa İttifaqının müxtəlif ölkələri ilə danışıqlar apararaq sanksiyaların təsirini azaltmağa çalışır”.

Qeyd edək ki, ABŞ Prezidenti Donald Tramp İranın nüvə proqramı ilə bağlı Hərtərəfli Birgə Fəaliyyət Planının qəbulundan sonra İrana qarşı ləğv edilmiş sanksiyaların yenidən işə düşməsi ilə bağlı fərman imzalayıb.

Bundan başqa, Tramp İrana qarşı tətbiq edilən sanksiyaları pozanlara qarşı sanksiyanın tətbiqi barədə də fərman imzalayıb.

Twitter