Bu proseslər İranda vəziyyəti xeyli ağırlaşdıracaq və İranı sözün həqiqi mənasında inqilabi şəraitə gətirib çıxaracaq.

Bu sözləri Axar.az-a açıqlamasında politoloq Qabil Hüseynli deyib. O bildirib ki, ABŞ İrana qarşı kifayət qədər ciddi sanksiyalar tətbiq etdi:

“İran neftdən asılı ölkədir və onun valyuta gəlirlərinin çox böyük hissəsi neft və qazdan əldə edilir. Əgər noyabrda da nəzərdə tutulan sanksiyalar işə başlasa, demək olar ki, indidən iflic halına düşmüş İran maliyyə bazarı o zaman daha ciddi çətinliklərlə baş-başa qalacaq. Onsuz da İran rialı dollar qarşısında sürətlə ucuzlaşmaqdadır. Bu ucuzlaşmanı dayandırmaq mümkün olmur və hələ uzun müddət mümkün olacağı gözlənilmir. Çünki İran xəzinəsi demək olar ki, boşdur və İran rialını sabit saxlamaq üçün əlavə maliyyə imkanları yox səviyyəsindədir. İstehsalın özündə də böhran yaşanmaqdadır. Bu sanksiyalar böhran vəziyyətini daha da dərinləşdirəcək”.

Politoloq qeyd edib ki, bu fonda ölkədə narazılığın günü-gündən artması və əhalinin böyük bir hissəsinin kütləvi etirazlara qoşulması, bu etirazlar zamanı dinc etirazçılara qarşı güc tətbiqi, hətta iştirakçılardan birinin atəş açılması nəticəsində öldürülməsi cəmiyyətdə çox böyük narazılıq yaradır:

“Bu narazılıq sürətlə yeni-yeni sahələri də əhatə etməkdədir. Ən diqqəti çəkən məqam odur ki, Qum şəhərində də etirazlar baş qaldırıb. Qumda teokratik rejimə qarşı şüarlar səsləndirilir. Demək olar ki, İran inqilabından sonra ilk dəfədir ki, Qumda belə bir hadisə baş verir. İranda əhali rejimə meydan oxuyur. Bütün bunları nəzərdə tutaraq, deyə bilərik ki, əhalinin etirazlarını dayandırmaq mümkün olmayacaq. Etirazlar daha da genişlənəcək”.

Politoloqun sözlərinə görə, azərbaycanlıların da bu prosesə qoşulması üçün birinci Təbrizin ayağa qalxması lazımdır:

“Bu gün İran rejimi bunu yaxşı başa düşür. Təbrizin ayağa qalxması ilə Cənubi Azərbaycanda bütün azərbaycanlıların prosesə qoşulması başlaya bilər. Hazırda Təbrizdə çox gücləndirilmiş polis nəzarəti var. ETTELAAT-ın işçilərinin də böyük bir hissəsi demək olar ki, Təbrizə səfərbər olunub. Əhalinin hətta bir yerə toplanmasını qadağan edirlər və qarşısını alırlar. Məlumata görə, parklarda və kütləvi gəzinti yerlərində də istirahət etməyə imkan vermirlər”.

Qeyd edək ki, Tramp İrana qarşı ikimərhələli sanksiyaların bərpası haqqında qərar imzalayıb. Ötən gündən İranın avtomobil sənayesinə, qızıl və digər qiymətli metal, eləcə də polad, kömür, alüminium ticarətinə, mülki aviasiya sektoruna, borc kağızlarına sanksiyalar və dollar əldə etməsinə qadağalar qüvvəyə minib.

Twitter