Qonşu ölkələrdə milli valyutaların məzənnəsində baş verən ciddi dəyişikliklər daha çox həmin dövlətlərlə ABŞ arasında siyasi müstəvidə yaranmış vəziyyətlə bağlıdır.

Bu sözləri Axar.az-a açıqlamasında keçmiş maliyyə naziri, professor Fikrət Yusifov deyib. Ekspert bildirib ki, Rusiya və İran Azərbaycanın yaxın qonşusu, iqtisadi və ticarət əlaqələrinin yüksək səviyyədə olduğu ölkələrdir.

“Həmçinin qardaş Türkiyə ilə bizim bütün səviyyələrdə münasibətlərimiz bu gün özünün pik həddinə çatıb. Bizim ümumi ticarət dövriyyəmizin 25%-i Türkiyə ilə Rusiyanın payına düşür. Qeyri-neft sektorundan ixracımızın böyük bir hissəsi də bu iki ölkənin daxili bazarında özünə yer tapır. Bu səbəbdən həmin ölkələrdə milli valyutaların sürətlə dəyər itirməsi arzuolunan deyil. Rusiya və Türkiyə bazarlarına ixrac etdiyimiz məhsulların qiymətini bu ölkələrin milli valyutalarının ucuzlaşdığı bir səviyyədə qaldırmaq mümkün deyil. Bu isə məhsullarımızın sözügedən ölkələrin yerli məhsulları ilə rəqabətinə təsir edə bilər. Qiymətlər qaldırılmadığı halda isə ixrac məhsullarımızın satışından ziyan təhlükəsi yarana bilər. Bu ölkələrdən idxal etdiyimiz məhsulların qiymətləri hesabına bəzi uduşlarımız olsa da, bütövlükdə belə vəziyyət ixracımız üçün arzuolunan deyil”.

F.Yusifov qonşu ölkələrin milli valyutaları ətrafında baş verən proseslərin manata ciddi təsirlərinin olmayacağını deyib:

“Azərbaycan hökuməti və Mərkəzi Bank zəruri qabaqlayıcı tədbirlər görməklə bu cür təsirləri neytrallaşdıra biləcəklər. Digər tərəfdən neftin qiymətlərinin bundan sonrakı dönəmlərdə artması ehtimalı çox böyükdür. İran neftinin ixracına qoyulan qadağa dünya bazarlarında neftin qiymətlərinin artımını stimullaşdıracaq. Bu isə öz növbəsində Azərbaycan manatının sabitliyini və ölkəmizə indikindən daha çox valyuta gəlirlərinin daxil olmasını təmin edəcək mühüm amillərdən biridir. Valyuta gəlirləri nə qədər çox olarsa, manatın məzənnəsinin sabitliyi təmin ediləcək. Digər tərəfdən Azərbaycan hökuməti son bir neçə ildə ölkə iqtisadiyyatının qeyri-neft sektorunun sürətli inkişafını təmin edəcək bir çox mühüm addımlar atıb. Atılan bu addımların artıq ilkin nəticələri diqqətəlayiqdir. İqtisadi böhrandan sonra ilk dəfədir ki, cari ilin yarım ili ərzində iqtisadiyyatın qeyri-neft sənayesində 9, aqrar sektorda 7 faiz artım qeydə alınıb. Bütün bunlar milli valyutamızın sabitliyinin qarantı kimi çıxış edir”.

Twitter