Merkelin Cənubi Qafqaza səfəri həm region, həm də Almaniyanın tarixi üçün əlamətdar hadisədir.

Bu sözləri Axar.az-a açıqlamasında Almaniya kansleri Angela Merkelin Bakıya gözlənilən səfərini şərh edən politoloq İlqar Vəlizadə deyib. Ekspert vurğulayıb ki, son zamanlar Almaniyanın NATO və Avropa İttifaqında mövqeyi möhkəmlənib:

“Almaniya hazırda özünəməxsus siyasət aparmaq niyyətindədir və kansler də bu məqsədlə regionda səfərdədir. Almaniya kanslerinin regiona səfəri eyni zamanda, siyasi, iqtisadi və hərbi məsələlərin müzakirəsinə həsr olunacaq. Bu baxımdan, Almaniya region ölkələri ilə müəyyən qarşılıqlı münasibətlərin qurulmasını planlaşdırır. Xüsusilə də Azərbaycanla Almaniyanın iqtisadi əməkdaşlığı qeyri-neft sektoru üzrə daha da inkişaf etdiriləcək”.

Ekspert kanslerin Bakıda Dağlıq Qarabağ məsələsinin həllinə dair konkret mövqe ortaya qoyacağını düşünür:

“Almaniyanın əsas mövqeyi bundan ibarət idi ki, tərəflər problemi ATƏT çərçivəsində çözməlidirlər. Ancaq indiki şəraitdə kanslerin bir qədər fərqli, daha konkret ifadələr səsləndirəcəyi gözləniləndir. Bu tanışlıq səfərindən sonrakı mərhələdə isə kanslerin hər üç region dövləti ilə konkret əməkdaşlıq proqramının hazırlanmasına və burada əsas aksentlərin müəyyən olunmasına dair tapşırıqlar verəcəyi istisna edilmir”.

Qeyd edək ki, Almaniya kansleri Angela Merkel bu gün Azərbaycana səfər edəcək.

Twitter