Azərbaycan Türkiyə-Rusiya yaxınlaşmasında maraqlı olmalı, bu məsələ üçün öz töhfələrini verməlidir. Ermənistan üçün Türkiyə-Rusiya ittifaqı ən xoşagəlməz ssenaridir.

Bu sözləri Axar.az-a Türkiyənin XİN rəhbəri Mövlud Çavuşoğlu, Müdafiə naziri Hulusi Akar və MİT sədri Hakan Fidanın Rusiya lideri Vladimir Putinlə görüşəcəyi ilə bağlı xəbərlərə münasibət bildirən politoloq Əhəd Məmmədli deyib. O bildirib ki, Türkiyə ilə Rusiyanın yaxınlaşmasının səbəbkarı Qərbdir:

“Bu iki ölkə ötən əsrin əvvəlində də yaxınlaşmışdılar. O vaxt hər iki dövlətin Qərblə münasibətləri müharibə səviyyəsində idi. İndi elə olmasa da, Türkiyə ilə Rusiyanın Qərblə münasibətləri gərgindir və daha da gərginləşməyə doğru gedir. Bu da istər-istəməz Türkiyə ilə Rusiyanı yaxınlaşdırır. Ümumiyyətlə, Türkiyə ilə Rusiyanın çox bağlılığı var. Türkiyənin slavyan, Rusiyanın da türk tarixi var. Əsrlərdir türklərlə slavyanlar bir məkanda yaşayıblar, yaşayırlar. Deməyim odur ki, Türkiyə ilə Rusiya daha səmimi müttəfiqə çevrilsələr, bu təkcə iki dövlət üçün deyil, müsəlman və pravoslav dünyası üçün də önəmli hadisə olacaq. Bunun belə olmamasını istəyən qüvvələr həm Türkiyə, həm də Rusiyanın içində var. Belə qüvvələrdən Qərb əsrlərdir istifadə edərək, Türkiyə ilə Rusiyanı bir-birinə vuruşdurub. Amma artıq Türkiyədə də, Rusiyada da anlayırlar ki, Qərbin fitnəsinə uyub savaşmaq deyil, dostlaşmaq lazımdır. Rusiya qırıcısının vurulması, rusiyalı səfirin öldürülməsi həmin bu fitnələrin davamı idi. Amma bu dəfə Qərbin Türkiyə ilə Rusiyanın arasını vurmaq planı sona qədər alınmadı. Ərdoğanla Putin cəld tərpənərək, vəziyyəti düzəltdilər. Ərdoğan və Putin istəsə, bu iki dövlət uzunmüddətli səmimi münasibətlər qura bilər. Bu isə Azərbaycanın da xeyrinədir”.

Politoloq qeyd edib ki, son bir həftə ərzində Türkiyənin Müdafiə naziri Hulusi Akar və MİT sədri Hakan Fidanın ikinci dəfə Moskvaya səfər etməsi isə ABŞ başda olmaqla, Qərbin Rusiya və Türkiyənin üstünə getməsindən irəli gəlir:

“ABŞ nə qədər Türkiyə ilə Rusiyanın üstünə gedəcək, bu iki qonşu o qədər bir-birlərinə yaxınlaşacaq. Bu yaxınlaşma Rusiya ilə Türkiyə arasında böyük müttəfiqliyə çevrilə bilər. Bir həftə ərzində Türkiyənin müdafiə, xarici işlər nazirinin və dövlət müstəşarının Moskvaya səfəri ciddi xəbərlərdir. Bu danışıqlarda iki ölkə arasında daha operativ və genişmiqyaslı münasibətlərin qurulması nəzərdə tutulur, dəqiqləşdirilir”.

Politoloq vurğulayıb ki, Türkiyə ilə Rusiya bir yerdə olsa, Azərbaycan üçün tarixi şans yaranır:

“Ötən əsrin əvvəlində məhz Türkiyə ilə Rusiyanın yaxınlaşması səbəbindən Qarabağla Naxçıvan Göyçə, Dərələyəz və Zəngəzurun taleyini yaşamadı. Yüz ildən sonra növbəti Türkiyə-Rusiya yaxınlaşması Azərbaycan üçün işğal olunmuş Qarabağı qaytarmaq imkanlarını çoxaldacaq”.

Qeyd edək ki, son bir həftə ərzində Türkiyənin Müdafiə naziri Hulusi Akar və MİT sədri Hakan Fidan artıq ikinci dəfədir Moskvaya səfər edib.

Twitter