Bu gün Azərbaycanın Milli Qəhrəmanı Çingiz Mustafayevin doğum günüdür.

Kult.az xəbər verir ki, Çingiz Fuad oğlu Mustafayev 1960-cı il avqustun 29-da Həştərxan vilayətinin Axtyubinsk rayonunun Kapustin-Yar qəsəbəsində anadan olub. O, Cəmşid Naxçıvanski adına hərbi liseydə 10-cu sinfə qədər təhsil alıb. 1977-ci ildə Yasamal rayonunda 167 saylı məktəbi bitirərək, Azərbaycan Tibb Universitetində təhsilini davam etdirib.

Azərbaycanda ilk disko-klubun yaradıcısı olub, ölkənin “di-ceyi” (DJ) kimi tanınıb. 1990-cı illərdə Azərbaycan televiziyasında “İmpromptu”, “Cümə axşamı” verilişlərinin, “Gənclik” estrada tamaşasının və “Ozan” rok qrupunun yaradıcısı olub.

1990-cı il 20 Yanvar hadisələri zamanı Mustafayev klinikanı terapevt mərkəzi kimi istifadə edib. 1991-ci ilin noyabr ayından jurnalist və Azərbaycan Dövlət Televiziyasında reportyor kimi fəaliyyət göstərib. Ölkənin döyüş gedən bütün bölgələrindən operativ xəbərlər, ayrı-ayrı əsgərlər haqqında xüsusi reportajlar və bütün bunlarla yanaşı, Azərbaycanda gedən siyasi proseslər barədə ətraflı informasiyalar hazırlayıb.

Çingiz Mustafayevin ölümündən sonra Azərbaycan Respublikasının sabiq prezidenti Əbülfəz Elçibəy 6 noyabr 1992-ci ildə 3 jurnalistə - Mustafayev Çingiz Fuad oğlu, Mustafayev Alı Mustafa oğlu və Əsgərova Salatın Əziz qızı - Qarabağın dağlıq hissəsində baş verən hadisələrin respublika və dünya ictimaiyyətinə çatdırılmasında xüsusi xidmətlərinə, xidməti borcunu yerinə yetirərkən igidlik və şücaət göstərdiyinə görə Azərbaycanın Milli Qəhrəmanı adı verib.

“215-KL” studiyasının direktoru Nicat Əliyev studiya ilə bağlı xatirələrini bölüşərkən ad seçimində Çingiz Mustafayevin ideyasının əsas rolu olduğunu bildirib:

“Çingiz çox obyektiv oğlan idi. Qəribəliklər var idi onda. Hər şeydə bizdən seçilirdi. İstər geyimində, istər danışığında, hərəkətlərində. Biz öyrənmişdik rəhbərlik altında işləməyə, necə deyərlər, çərçivədən çıxmamağa. Çingizdə isə bunlar yox idi. O, azad idi, azadlığı, sərbəstliyi sevirdi. Ona elə gəlirdi ki, bir şeyi istədiyi cür çəkib efirə verə bilər. Bacarıqlı və zirək oğlan idi. Qaynar nöqtələrə getməkdən heç vaxt çəkinmirdi.

Bir gün Çingizlə “Moskva” mehmanxanasının kafesində çay içirdik. Birdən Çingiz belə bir fikir irəli sürdü ki, studiyanın yaranması haqqında verilən əmrin nömrəsi necə olsa, bu rəqəmi də ad kimi qəbul eləyək. Beləliklə, əmrin nömrəsi oldu 215. Əmr rusca verildi. KL- “kadrovıy listok” sözlərinin baş hərfləridir. Studiyamız oldu “215 kl”. Bu, Çingizin ideyası idi”.

Qeyd edək ki, Çingiz Mustafayev 1992-ci il iyunun 15-də Xocalı rayonunun Naxçıvanlı kəndində çəkiliş zamanı aldığı mərmi qəlpəsindən həyatını itirib.

Twitter