Nikol Paşinyan hakimiyyətinin 100 günündə hələ də özünü legitim hiss etmir.

Bu sözləri Axar.az-a açıqlamasında Avrasiya Təhlükəsizlik və Strateji Araşdırmalar Mərkəzinin sədri, politoloq Hatəm Cabbarlı deyib. O bildirib ki, bu, Ermənistan Respublikaçılar Partiyasının parlamentdə hələ də əksəriyyəti təşkil etməsi və koalisiya hökumətinin zəif olmasından irəli gəlir:

“Nəinki parlament, heç koalisiya hökumət üzvləri də Paşinyanın 1 saat sonra necə qərar verəcəyini təxmin edə bilmir və hələlik gözləmə mövqeyindədirlər. Daxili siyasətdə yaşanan bu qeyri-müəyyənlik xarici siyasətə də təsir edir. Paşinyan Ermənistanın ənənəvi müttəfiqi olan Rusiya ilə münasibətləri məsafəli saxlamağa çalışır. Bu, gec və yaxud tez, Rusiya tərəfindən adekvat cavabla nəticələnə bilər. Rusiyanın Ermənistana təzyiqi arta, ekonomik sahədə daha ciddi problemlər yarana bilər”.

Politoloq vurğulayıb ki, Ermənistanda son 27 ildə iqtidarda olan hökumətlər istisnasız olaraq korrupsiyaya bulaşıb:

“Paşinyan hökumətinin də bulaşmayacağına heç kim təminat verə bilməz. Amma Paşinyan hələ ki, populyarlığından istifadə edərək, keçmiş hökumətlə haqq-hesab çəkməyə çalışır. Görünən odur ki, respublikaçılar hələ dirəşə bilirlər”.

Politoloqun sözlərinə görə, Ermənistanda keçirilməsi düşünülən parlament seçkiləri ərəfəsi və sonrasında vəziyyətə kim nəzarət edəcəksə, seçkilərin qalibi də o olacaq:

“Ancaq hələlik nə Paşinyan hökumətinin, nə də respublikaçıların ölkədaxili vəziyyətə nəzarət etdiyini söyləmək mümkündür. Digər tərəfdən, hər hansı bir dövlət digər dövlətə nə qədər siyasi və iqtisadi yardım etsə də, heç bir ölkədə hökumətin daxili dəstəkçiləri olmadan hakimiyyətdə qalması mümkün deyil. Paşinyan üçün ən böyük məqsəd Avropa dövlətlərinin və ABŞ-ın dəstəyini almaqdır. Paşinyanın ABŞ səfərində hər hansı cəhdlə nəticə alması mümkün deyil. Çünki İrəvan hələ rəsmi siyasi kursunu müəyyən etməyib və Paşinyanın xarici siyasətdə hədəfi tam aydın deyil. Ona görə də ABŞ hökuməti Ermənistanın iqtisadi vəziyyətinə təsir edəcək və onu böhrandan çıxaracaq heç bir addım atmayacaq”.

Twitter