Soçi görüşünün nəticəsi olaraq imzalanmış ikitərəfli sazişlər və bu sazişlərin real işlək mexanizmlər vasitəsilə həyata keçirilməsi çox vacibdir.

Bu sözləri Axar.az-a Prezidenti İlham Əliyevin Rusiya səfəri və bu fonda iki ölkə arasında imzalanmış sazişlərlə bağlı danışan iqtisadçı ekspert Natiq Cəfərli deyib. İqtisadçı Soçidə Rusiya-Azərbaycan əməkdaşlığının əsas istiqamətlərinin inkişafı ilə bağlı fəaliyyət planı üzrə Yol Xəritəsinin Bakı üçün mühüm əhəmiyyət kəsb etdiyini vurğulayıb:

“Azərbaycanın ən böyük ticarət tərəfdaşlarından biri məhz Rusiyadır. Rusiya Azərbaycanın qeyri-neft sektorunun ixracatında önəmli yer tutur. Çünki kənd təsərrüfatı məhsullarımızın böyük bir qismi məhz Rusiyaya ixrac olunur. Bu baxımdan Rusiya ilə Azərbaycan arasında əməkdaşlığın əsas istiqamətlərinin inkişafı üzrə fəaliyyət planı, iki ölkə arasında iqtisadi və sənaye sahəsində əməkdaşlığın möhkəmləndirilməsi haqqında sazişləri xüsusilə qeyd etmək olar. Birincisi, iki ölkə arasında iqtisadi əməkdaşlığa dair “yol xəritələri” əmtəə dövriyyəsini daha da artırmağa imkan verəcək. İkincisi, ixrac zamanı sərhəddən sürətli keçidlə bağlı müəyyən problemlərin yaşanmasının qarşısı alınacaq. O üzdən Soçi görüşünün nəticəsi olaraq imzalanmış ikitərəfli sazişlər və bu sazişlərin real işlək mexanizmlər vasitəsilə həyata keçirilməsi çox vacibdir. Çünki doğurdan da Azərbaycan üçün Rusiya coğrafi olaraq ən yaxın, böyük və sərfəli bazarlardan biridir. Bu nöqteyi-nəzərdən Azərbaycan kənd təsərrüfatı məhsullarının heç bir problem yaşanmadan Rusiyaya ixracatının təmin edilməsində maraqlıdır”.

İqtisadçı bildirib ki, imzalanan sazişlər Azərbaycanın Rusiya bazarına çıxışı üçün olduqca vacibdir:

“Azərbaycan qeyri-neft sektorunu inkişaf etdirən ölkə kimi Rusiya ilə əlaqələrə, bu böyük bazara daha rahat çıxmağa maraqlıdır. Bu, Azərbaycanın aqrar sektoru üçün çox vacibdir. Azərbaycanın çoxşaxəli ixracat modelinə keçməsi vacibdir”.

Ekspert hesab edir ki, Soçi görüşünün nəticələrinə uyğun olaraq sürətli keçid və yaşıl koridor siyasəti ilə bağlı müəyyən addımlar atılacaq:

“Bu da Azərbaycan üçün olduqca sərfəlidir. Rusiya 145 milyon əhalisi olan böyük qonşu dövlətdir və Azərbaycanın imkanı var ki, aqrar sahədə kifayət qədər böyük paya sahib olsun. Çünki Rusiyanın kənd təsərrüfatı, aqrar sənaye və yeyinti məhsulları bazarının illik satış həcmi təqribən 60 milyard dollardır. Azərbaycan bunun 2-3 faizini belə götürsə, bu, təqribən 1.5 milyard dollara yaxın vəsait edir ki, bu da ölkəmizin aqrar sektoru üçün böyük bir stimuldur”.

Twitter