Rusiya Türkiyə-ABŞ münasibətlərinin gərginləşdiyindən istifadə edərək Türkiyənin İdlib məsələsində güzəştlərə getməsini istəyir.

Bu sözləri Axar.az-a açıqlamasında politoloq Əhəd Məmmədli deyib. O bildirib ki, Rusiyanın məlum görüşdən əvvəl İdlibi bombalaması Türkiyəyə mesajdır:

“Türkiyəyə eyni vaxtda həm ABŞ, həm Rusiya ilə üz-üzə gəlmək çətin olacaq. Moskva da bunu bilərəkdən tərəfdaşı Ankaraya təzyiq etmək qərarına gəlib. Buna rəğmən Türkiyə Suriya ilə sərhəddə qoşun yığmaqdadır. İdlibdə Türkiyənin 12, Rusiyanın 10, İranın 7 hərbi məntəqəsi var. Türkiyə üçün İdlib vacib əhəmiyyət daşıyır. Rusiya və İranın Türkiyəyə təzyiqlərinə baxmayaraq, Türkiyə nə diplomatik masada, nə hərbi meydanda İdlibi asanlıqla verəcək”.

Politoloq vurğulayıb ki, İdlibə hücum ABŞ-ın maraqlarına da cavab vermir:

“İdlib alınsa, ələvilər kürd regionuna tam yaxınlaşacaq. Bu da gələcəkdə Suriyada ABŞ-İsrail və Rusiya-İran qarşıdurmasına gətirib çıxara bilər. Həmçinin İdlibdə yeni müharibə növbəti humanitar fəlakətə gətirib çıxaracaq. Bu da Türkiyədən əlavə, Avropa Birliyinin də mənafeyinə cavab vermir. Bu, bir millyon qaçqın deməkdir”.

Politoloqun sözlərinə görə, İdlib müharibəsi yeni kimyəvi hücum təhlükəsi anlamına gəlir:

“Yeni kimyəvi hücumlar isə Suriyada gərginliyin pik nöqtəyə gəlməsinə şərait yaradar: Türkiyə, ABŞ, Rusiya, İran və İsrail açıq müstəvidə bir-birinə güllə atmağa başlasa, bu hələ çox qan aparacaq. Əsəd Rusiya və İranın dəstəyi ilə İdlibi alıb müxalifətin son qalasını məhv etmək istəyir. Bununla da müharibəni böyük anlamda bitirmək niyyətindədir. Əslində isə İdlib qırğını Suriyada vətəndaş müharibəsinin daha da uzanmasına gətirib çıxara bilər”.

Politoloq qeyd edib ki, Türkiyə-Rusiya danışıqlarından çox şey asılı olacaq:

“Artıq İdlibdə rus bombaları altında uşaqlar ölür. İdlibə bombaların yağması davam etsə, Suriya müharibəsi yeni fazaya keçər. Bu cür ssenari isə Suriyanın bir dövlət kimi siyasi xəritədən silinməsinə gətirib çıxarar”.
Qeyd edək ki, Rusiya ilə bağlı İran-Türkiyə-Rusiya danışıqları 7 sentyabrda Tehranda keçiriləcək.

Twitter