Azərbaycan Prezidentinin Xorvatiyaya səfəri iki ölkə arasındakı münasibətlərin strateji tərəfdaşlıq xarakteri daşıdığını bir daha ortaya qoydu.

Bu sözləri Axar.az-a Prezident İlham Əliyevin Xorvatiyaya səfərini şərh edən sabiq dövlət müşaviri Qabil Hüseynli deyib. Politoloqun sözlərinə görə, ölkəmizlə Xorvatiya arasındakı münasibətlərin yeni səviyyəsi Azərbaycanın Avropa Birliyi ilə yaxınlaşmasında önəmli rol oynayacaq:

“Xorvatiya Avropa Birliyi və NATO-nun əsas ölkələrindən biridir. Bu dövlət Avropanın mərkəzində yerləşir və sənaye baxımından da olduqca inkişaf edib. Bu, ikitərəfli əlaqələr üçün mühümdür. Azərbaycan Prezidentinin Xorvatiyaya səfəri iki ölkə arasındakı münasibətlərin strateji tərəfdaşlıq xarakteri daşıdığını bir daha ortaya qoydu. Üstəlik, Xorvatiya Prezidenti Kolinda Qrabar-Kitaroviç ölkəmizə olan rəğbətini gizlətmədi və ölkəsinin Azərbaycanı özünə bölgənin güclü iqtisadi potensialı olan ölkə kimi strateji tərəfdaş seçdiyini bəyan etdi. Zənnimcə, Xorvatiya ilə münasibətlərin yeni səviyyəsi nəinki Azərbaycanın Avropa Birliyi ilə yaxınlaşmasında önəmli rol oynayacaq, eləcə də NATO ilə əlaqələrə də müsbət təsir edəcək. Çünki Xorvatiya Avropa Birliyində, eləcə də NATO-da xüsusi çəkisi olan ölkələrdən biridir”.

Politoloq hesab edir ki, Xorvatiya-Azərbaycan münasibətlərinin strateji tərəfdaşlıq səviyyəsinin bir daha təsdiq edilməsindən sonra bu ölkə Bakının AB və NATO-da lobbiçiliyini də edə biləcək:

“Xorvatiya Azərbaycanın ərazi bütövlüyü məsələsini NATO və Avropa Birliyində dəfələrlə dəstəkləyib. Bu o deməkdir ki, Xorvatiya bundan sonra ölkəmizin ərazi bütövlüyü, eləcə də Azərbaycanın Qərb oriyentasiyasına cəlb edilməsi məsələsini Avropa Birliyi və NATO-da daha cəsarətlə və uğurla dəstəkləyəcək”.

Q.Hüseynli Xorvatiyanın Azərbaycanda daimi səfirliyinin açılması məsələsinin də tezlikdə həllini tapacağını bildirib:

“Artıq münasibətlər o həddə çatıb ki, mütləq qarşılıqlı səfirliklər açılmalı, diplomatik missiya ortaya qoyulmalıdır. Ola bilsin ki, birinci olaraq Xorvatiyanın Azərbaycanda səfirliyi açıldı”.

Twitter