Azərbaycanın ikitərəfli əlaqələrin inkişaf etdirilməsi və strateji tərəfdaşlıqların daha da gücləndirilməsi istiqamətində yürütdüyü xarici siyasət çevik və fəal diplomatiyanın nəticəsidir.

Bu sözləri Axar.az-a Prezident İlham Əliyevin son xarici səfərlərinə münasibət bildirən millət vəkili Fazil Mustafa deyib. Millət vəkili Prezident İlham Əliyevin həyata keçirdiyi xarici siyasətin milli maraqlara söykəndiyini vurğulayıb:

“Azərbaycanın çevik və balanslı xarici siyasət kursu, beynəlxalq tədbirlərə ev sahibliyi etməsi, müxtəlif səviyyəli layihələrdə iştirakı və mühüm iqtisadi layihələri həyata keçirməsi indiki məqamda olduqca vacib sayılır. Ölkə prezidenti hazırda bu istiqamətdə çox fəal bir siyasət aparır və bu kursun faydalı nəticələrinin şahidi olmaqdayıq. Son günlərdə Azərbaycanın xarici siyasət kursu öz fəallığı ilə seçilir. Prezident İlham Əliyevin son iki həftədə Rusiya, Qırğızıstan və Xorvatiyaya səfərləri və həmin ölkələrlə imzalanmış sazişlər bunu bir daha sübut edir”.

Millət vəkili bildirib ki, Azərbaycanın Rusiya ilə münasibətlərini daha da inkişaf etdirməsi baxımından ölkə rəhbəri vacib addımlar atdı:

“Eyni zamanda, türkdilli ölkələrin vahid formatda birləşməsi məsələsində də faydalı işlər görüldü. Bu, birbaşa Azərbaycanın nüfuzunun qalxmasına xidmət edir. Nəhayət, ölkə rəhbərinin Xorvatiyaya səfər Bakının xarici dinamik siyasətinin və yüksək beynəlxalq nüfuzunun bariz göstəricisidir. Xorvatiya Avropa məkanında aparıcı ölkələrdən biridir. Bu NATO ölkəsi ilə münasibətlərin inkişafı Azərbaycan üçün zəruridir. Bütövlükdə, hər üç səfər olduqca əhəmiyyətlidir və bu səfərlərin konkret nəticələrini yaxın zamanlarda görəcəyik. Azərbaycanın yürütdüyü xarici siyasət çevik və fəal diplomatiyanın nəticəsidir və verilən müsbət reaksiyalar dünyada Azərbaycana hörmətlə yanaşıldığını əyani şəkildə təsdiq edir. Ümid edirəm ki, bu xarici siyasət xüsusilə regionda və bu bölgədə Azərbaycanın ciddi bir güc mərkəzi olaraq tanınmasına xidmət edəcək. Bakı ikitərəfli xarici əlaqələrin inkişaf etdirilməsi prosesini davam etdirəcək və bu fonda qarşıda mühüm səfərlərin şahidi olacağıq”.

Twitter