Ermənistanın sabiq prezidenti Robert Köçəryan qatı cinayətkardır.

Onunla bizim ayrıca haqq-hesabımız olacaq. O, Azərbaycanda tökülən qanlara görə cavab verməlidir. Köçəryanla bağlı aparılan istintaq həm də onun erməni xalqının qanuna susamış cani olduğunu göstərir.

Bu sözləri Teleqraf.com-a açıqlamasında Milli Məclisin deputatı, ali qanunverici orqanda 122 saylı Xankəndi seçki dairəsini təmsil edən Flora Qasımova deyib.

Deputat hesab edir ki, Ermənistanın yeni hakimiyyəti öz ölkəsinin gələcəyini düşünürsə, ilk növbədə işğalçılıq siyasətinə son qoymalıdır: “1 milyon köçkün illərdir düzlərdə qalıb köçkünlük həyatı yaşayır. Bunun cavabını Paşinyandan da, Köçəryandan da istəyəcəyik. Paşinyan Qarabağın Ermənistanın tərkib hissəsi olduğunu deyib. Hələ başa düşmür ki, Ermənistan torpaqları Azərbaycanın bir parçasıdır. Gedib tarixi öyrənsin. Ermənistan dövləti olmayıb, dövlətçilik təcrübələri olmadığına görə yeni dövlət qura bilməyiblər. Sərhədboyu qonşularına qarşı ərazi iddiaları irəli sürürlər. Paşinyanın Dağlıq Qarabağ münaqişəsinin tənzimlənməsi ilə bağlı söylədiyi fikirlərlə beynəlxalq hüququn norma və prinsiplərini pozur. Onun bu bəyanatları Ermənistanın Azərbaycan ərazilərinin işğalını davam etdirmək niyyətini büruzə verir. Orada gündə biri hakimiyyətə gəlir, hamısı barəsində də cinayət işi açılır. Paşinyan qəhrəmanlıq etdiyini düşünür, kimlərinsə fitvası ilə təbliğata başlayıb. Halbuki Ermənistan bir dövlət kimi özünü sübut edə bilmir, Rusiyanın for-postudur, Rusiya onun arxasından çəkilsə, yer üzündə Ermənistan adında dövlət olmayacaq”.

Flora Qasımovanın fikrincə, Azərbaycanla Ermənistan arasında ciddi fərqlər mövcuddur: “Azərbaycanın dünyanın bütün ölkələri ilə siyasi, iqtisadi, mədəni əlaqələri, xoş münasibəti var. Dövlət kimi özümüzü təsdiq eləmişik, dünyada nüfuzumuz var. Torpaqlarımızın işğaldan azad olunacağı gün də uzaqda deyil”.