Aydındır ki, indiki situasiya 2013-cü ildə Qazaxıstan Prezidenti Nursultan Nazarbayevin “Ermənistanı Avrasiya İttifaqına yalnız beynəlxalq tanınmış sərhədləri çərçivəsində, yəni Qarabağ ərazisi olmadan qəbul etmək lazımdır” bəyanatını təkrarlayır.

Bundan sonra Ermənistanda Qazaxıstan və bu ölkənin prezidentinə qarşı guya Astananın müttəfiq respublikanı dəstəkləmədiyi, qeyri-dost mövqeyi tutduğu üçün informasiya hücumu başladı.

Bu sözləri Axar.az-a açıqlamasında qazaxıstanlı politoloq Andrey Çebotarev deyib.

“Bu gün praktik olaraq eyni şey, amma daha kiçik miqyaslı formada yaşanır. Ümumilikdə demək lazımdır ki, Ermənistan siyasi və media elitası Qazaxıstana münasibətdə Astananın Azərbaycanla əməkdaşlığa üstünlük verdiyi üçün qeyri-dost mövqeyi tutur. Ona görə də Ermənistan tərəfi KTMT və Avrasiya İttifaqına üzvlüyünə rəğmən Azərbaycanla Qazaxıstanın daha isti münasibətinə qısqanclıq və müəyyən aqressiya ilə yanaşır”, – deyə o bildirib.

Onun sözlərinə görə, erməni tərəfinin KTMT və digər birliklərdən çıxacağı ilə bağlı bəyanatları anlaşılmazdır:

“Bu ölkənin KTMT və Rusiya hərbi bazası olmadan öz təhlükəsizliyini ciddi şəkildə təmin edəcəyini təsəvvür etmək çətindir. Ona görə də Paşinyanın Rusiya, Qazaxıstan və Belarusa qarşı bütün qeyri-dost demarşlarına rəğmən, mən şəxsən bu ölkənin KTMT-dən çıxacağına şübhə ilə yanaşıram. Əgər hətta hazırkı rəhbərlik tərəfindən hansısa prosedurlar həyata keçirilsə belə, bu elitanın içərisində güclü müxalifət tapılacaq ki, bunun çıxış yolu olmadığını başa salsın. Demarşlar etmək, çıxış və Qərblə yaxınlaşmaq haqqında bəyanatlar vermək olar, amma bu, çətin ki, Ermənistana öz təhlükəsizliyini təmin etməyə kömək etsin. Ümid edirəm ki, İrəvan təşkilat çərçivəsindəki tərəfdaşlıq xəttində bütün fikir ayrılıqlarına rəğmən, bunu anlayır”.

O, Astananın dəfələrlə Qarabağ konfliktinin həm MDB çərçivəsində, həm də 2010-cu ildə ATƏT-ə sədrliyi dövründə həlli üçün təkliflər etdiyini bildirib:

“Təbii ki, bəzi məqamlara görə, Qazaxıstan etnik, dini, iki ölkəni birləşdirən iqtisadi faktorlar baxımından Azərbaycanla yaxındır. Amma Astana tərəf tutmayıb. Sadəcə, Qazaxıstan beynəlxalq hüquqa uyğun konfliktin Azərbaycanın ərazi bütövlüyü çərçivəsində həll edilməsini istəyir".

Twitter