Türkiyə-ABŞ gərginliyi açıq münaqişəyə keçməyəcək.

Bu sözləri Axar.az-a açıqlamasında politoloq İlqar Vəlizadə deyib. Ekspertin sözlərinə görə, yaxın perspektivdə sözügedən ölkələr arasında ikitərəfli münasibətlərdə müsbət istiqamətdə dəyişiklik gözlənilmir:

“Bu da bir çox amillərlə, xüsusilə də ABŞ-ın regionda yürütdüyü sərt siyasətlə əlaqədardır. Belə ki, ABŞ birmənalı olaraq İsraili və Suriyadakı kürd birləşmələrini dəstəkləməkdən imtina etmək niyyətində deyil. Əlbəttə ki, bu da Türkiyəni qıcıqlandırır və Ankaranı regionda adekvat addımlar atmağa vadar edir. Bu vəziyyətin dəyişməsi üçün tərəflər ən azı öz siyasətlərində korrektələrə getməlidirlər. Bu mənada ABŞ Yaxın Şərq siyasətini yumşaltmalı, Türkiyə isə daha çox amerikapərəst siyasətə keçməlidir. Reallıqları nəzərə alsaq, bu, indiki ərəfədə tamamilə mümkünsüzdür. Bu fonda ABŞ-Türkiyə ikitərəfli münasibətlərinin yaxşılaşmasını gözləmək düzgün olmazdı. Çünki gərginlik qarşıdakı dönəmlərdə də davam edəcək”.

Politoloq ABŞ-ın hazırda regionda çox ziddiyyətli siyasət apardığını bildirib:

“Bu da sözügedən ölkənin yaxın tərəfdaşları ilə münasibətlərinin korlanmasına gətirib çıxarır. Əslində, bu durum Türkiyə üçün əlverişlidir. O üzdən hesab edirəm ki, Türkiyə yaranmış bu vəziyyətdən maksimum istifadə edərək öz mövqelərini möhkəmləndirməyə və müəyyən dərəcədə ABŞ-a təsir göstərməyə çalışacaq. Fikir verirsinizsə, son günlər Suriyada Rusiya-Türkiyə-Fransa formatı formalaşmağa başlayıb. İnanmıram ki, bu format çərçivəsində keçirilən görüşlər ABŞ-ın xoşuna gəlsin. Bu isə ABŞ və Fransa arasında yeni ziddiyyətlərin yaranacağından xəbər verir. Türkiyə bundan da istifadə etməyə çalışacaq. Belə bir siyasət isə Ankara üçün məhsuldar olacaq və öz bəhrəsini verəcək. Zənnimcə, Türkiyə bu yeni siyasətə çox yaxın vaxtlarda keçəcək”.

Twitter