Rusiyanın hansı tədbirlər görəcəyini, yaxud görməyəcəyini müəyyənləşdirmək imkanımız yoxdur.

Moskvanın real təzyiqləri hələlik nəzərə çarpmır.

Bu sözləri Axar.az-a Rusiya XİN rəhbəri Sergey Lavrovun Köçəryanın həbsi ilə bağlı açıqlamasına münasibət bildirən analitik Elçin Mirzəbəyli deyib. O bildirib ki, Lavrovun açıqlaması kifayət qədər yumşaq, daha dəqiq desək, incik olduğu üçün bunun Ermənistan rəhbərliyinə təzyiq xarakteri daşıdığını düşünmür:

“Bu açıqlama sadəcə xatırlatmadır. Prosesin davamı isə Ermənistan rəhbərliyinin reaksiyasından sonra bəlli olacaq. Görünür, Paşinyanın reabilitasiyası ilə bağlı öhdəliklərin götürülməsində Lavrovun da müəyyən rolu olub. Əks təqdirdə Köçəryanın həbsinə verilən reaksiya xarici işlər nazirinin gündəmində olmamalıydı. Prinsip etibari ilə Köçəryanın həbsinin diplomatik münasibətlərə heç bir aidiyyəti yoxdur. Bu məsələyə Rusiya parlamentinin ayrı-ayrı deputatları, KTMT, Avrasiya İttifaqı rəhbərliyində təmsil olunan şəxslər, Rusiyanın ombudsmanı, əgər qalıbsa, hüquq-müdafiə təşkilatları reaksiya versəydi, bunu anlamaq olardı”.

Analitikin sözlərinə görə, Lavrovun açıqlamasının başqa bir tərəfi isə Rusiyanın Ermənistanın daxili işlərinə açıq şəkildə müdaxiləsinin, hətta bu ölkənin baş nazirindən ölkədaxili məsələlərlə bağlı öhdəlik almaq kimi dövlətlərarası münasibətlərdə nonsens sayıla biləcək addımlar ata biləcəyinin etirafıdır:

“Bu isə o deməkdir ki, Rusiya hələ də Ermənistanı forpost statusunda görür. Digər tərəfdən, Paşinyan Lavrovun dediyi kimi, siyasi təqiblərə yol verməyəcəyi barədə öhdəlik götürübsə, Moskva bunun qarşılığında Paşinyana hansı vədləri verib? Rusiyanın son 1 ay ərzində nəzərə çarpan qeyri-müəyyən davranışları Paşinyana, yaxud onun sahiblərinə verilən vədlərdən qaynaqlanmır ki?! Suallar çoxdur. Bütün bunlara aydınlıq gəlməsi üçün müəyyən qədər gözləməyin lazım olduğunu düşünürəm”.

Analitik vurğulayıb ki, Ermənistanın hansısa mərhələdə yenidən qarşıdurma meydanına çevriləcəyi ehtimalı çoxdur:

“Çünki Köçəryan-Sərkisyan cütlüyünün yaxın ətrafı və onların əldə etdikləri kapital hansısa mərhələdə stimullaşdırıcı, hərəkətverici faktor kimi özünü göstərə bilər. Ola bilsin ki, bu, seçkilər ərəfəsində baş verəcək. Hər halda Ermənistanda proseslərin tezliklə səngiyəcəyi inandırıcı görünmür. Amma indiki məqamda Paşinyanın konkret təlimatlarla hərəkət etdiyi, seçkilərdə ona maneə yarada biləcək faktorları neytrallaşdırmaq istədiyi açıq-aşkar görünür”.

E.Mirzəbəyli Ermənistanda son baş verən proseslərdə Qərbin əli olub-olmadığına da münasibət bildirib:

“Qərb mücərrəd bir məkan anlayışıdır. Buradakı münasibətlər heç 5 il öncəki kimi deyil. ABŞ-la ənənəvi müttəfiqləri arasındakı ziddiyyətlərin spektri də getdikcə genişlənir. Bu baxımdan ümumiləşdirilmiş şəkildə Ermənistanda baş verən proseslərdə ünvan kimi, həm də bütöv bir geosiyasi məkan şəklində yalnız Qərbi göstərmək düzgün olmazdı. Amma Paşinyanın hərəkət trayektoriyasında ABŞ və Avropa İttifaqının bəzi institutlarının izi görünür”.

Qeyd edək ki, dünən Rusiya XİN rəhbəri Sergey Lavrov Ermənistanın yeni rəhbərliyinin siyasi təqiblərinə yol verməyəcəyi ilə bağlı səsləndirdiyi bəyanatlara baxmayaraq, hazırda bunun tam əksinə davrandıqlarını deyib.

Twitter