Millət vəkili Qənirə Paşayevanın dəvəti ilə Türkiyənin Şanlıurfa Böyükşəhər bələdiyyəsinin başqanı Nihad Çiftçi, Malatyanın Battalqazi bələdiyyəsinin başqanı Səlahəddin Gürkan, GAP Media mənsubları Cəmiyyətinin başqanı Həmid Özpolad və Duru TV-nin baş müdiri Məhməd Canbekdən ibarət heyət Fəxri Xiyabanı, Şəhidlər Xiyabanını və Türk Şəhidliyini ziyarət ediblər.

Axar.az xəbər verir ki, millət vəkili Türkiyə nümayəndə heyətinin üzvlərinə Ermənistanın işğalçılıq siyasəti barədə geniş məlumat verib.

O, eyni zamanda türkiyəli qonaqlara XX yüzillikdə Şərqdə ilk parlamentli respublikanın məhz Azərbaycanda qurulması və ölkənin ali qanunvericilik orqanı, fəaliyyəti barədə də danışıb.

Daha sonra Türkiyə nümayəndə heyəti millət vəkili Qənirə Paşayevanın müşayiəti ilə Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev ilə görüşüblər.

Rövşən Rzayev qonaqlara Ermənistanın işğalçılıq siyasəti nəticəsində 1 milyon qaçqın və məcburi köçkünün öz evlərinə dönə bilməməsindən söz açıb.

Komitə sədri bildirib ki, dövlət qaçqın və məcburi köçkünlərin həyat şəraitinin yaxşılaşdırılması istiqamətində çoxsaylı işlər görməkdə davam etsə də, qaçqın və məcburi köçkünlər öz yurd-yuvalarına dönmək istəyirlər.

O, Dağlıq Qarabağ münaqişəsinin tənzimlənməsində hər zaman Azərbaycanın haqlı mövqeyini dəstəklədiyi üçün qardaş ölkəyə təşəkkür edib.

Q.Paşayeva qeyd edib ki, Şanlıurfa və Battalqazi hər il çoxlu sayda festivallara, yerli və beynəlxalq konfranslara, sərgilərə ev sahibliyi edir:

“Yaxşı olardı ki, Azərbaycanın məcburi köçkün rayonlarını təmsil edən teatrlar, folklor musiqi qrupları, rəssamları, şair və yazarları həmin tədbirlərə dəvət olunsunlar. Bu addım düşmənə yaxşı mesaj olardı”.

Komitə sədri Türkiyənin bələdiyyələri ilə əməkdaşlığa açıq olduqlarını, onların keçirdiyi tədbirlərdə məcburi köçkün və qaçqınların iştirakına hər cür dəstək göstəriləcəyini bildirib.

Görüşün sonunda türkiyəli qonaqlar Dövlət Komitəsi ilə hər cür əməkdaşlığa dəstək verməyə hazır olduqlarını bildiriblər.

Bundan başqa, Türkiyə nümayəndə heyəti ilə millət vəkilinin rəhbərlik etdiyi Avrasiya Beynəlxalq Araşdırmalar İnstitutu İB-də də görüş keçirilib.

Q.Paşayeva görüşdə bu ilin oktyabrında Şanlıurfa və Battalqazidə baş tutacaq Azərbaycan bulvarı və Qarabağ parkının açılışında Azərbaycan muğam musiqisi ifaçılarının iştirakını təmin etməyi öz üzərinə götürüb.

• 

Twitter