ABŞ və Türkiyə aralarında olan fərqli mövqelər üçün ortaq bir nöqtədə razılığa gələcəkləri halda regionda olan bir çox məsələlərdə, o cümlədən İranla bağlı siyasətdə birgə hərəkət edə biləcəklər.

Bu sözləri Axar.az-a açıqlamasında beynəlxalq əlaqələr üzrə ekspert Elşən Mustafayev deyib. O bildirib ki, ABŞ-Türkiyə münasibətlərinin yaxşılaşdırılması üçün ilk addımın ABŞ tərəfindən atılması buzları əridə bilər:

“ABŞ və Türkiyə arasında münasibətlərdə soyuqluq yaranan gündən demişdim ki, belə vəziyyət hər iki dövlətin maraqlarına ziddir və belə hal çox davam edə bilməz. Amma münasibətləri bu həddə gətirən səbəblər ortada var ikən əvvəlki səviyyədə əlaqələri bərpa etmək də çətin olacaq. Açıq deməsələr də bilirik ki, ABŞ və bir sıra Avropa ölkələri konkret Ərdoğan faktoruna görə Türkiyə ilə sərin münasibətdədirlər. Problemin pik həddə çatması isə dövlət çevrilişinə çəhd zamanı Fətullah Gülənə olan münasibətdən sonra olmuşdu”.

Ekspert Ərdoğanın özünə qarşı olan bu münasibətdən dolayı istəmədən Rusiya ilə yaxınlıq etməyə məcbur olduğunu düşünür:

“Sonradan Rusiyadan S-400 alınması ilə bağlı razılaşma, bir sıra iqtisadi layihələrdə birgə iştirak niyyətləri də bu səbəbdən doğmuşdu. Ona görə ilk addımı ABŞ atacaqsa, sonrakı mərhələdə Türkiyə daha fərqli siyasət yürüdəcək”.

Ekspert vurğulayıb ki, NATO ölkəsi olan böyük bir dövlətin uzun müddət belə bir vəziyyətdə qalması mümkün deyil:

“Türkiyəyə qarşı hər hansı sanksiyaların olması isə problemin həllində mövcud olan bütün vasitələrin tükənməsindən sonra ola bilər. Bu vasitələr isə tükənməyib və hazırda kifayət qədərdir”.

Twitter