Azərbaycan Milli Elmlər Akademiyası Mərkəzi Elmi Kitabxanasının “Vikipediya” Metodik Mərkəzinin könüllüləri Azərbaycan Respublikası Milli Təhlükəsizlik Nazirliyinin sabiq əməkdaşı, Qarabağ müharibəsi veteranı mərhum Əliyev Oqtay İrşad oğlu haqqında məqalə yaradıb.

Kult.az xəbər verir ki, Oqtay Əliyev 1960-cı ilin 18 oktyabrında Ağdamda doğulub. Burada 2 saylı beynəlmiləl orta məktəbdə təhsil alıb.

1990-cı ilin yanvar-fevral aylarında erməni silahlı dəstələrinə qarşı döyüşlərdə iştirak etmək üçün MTN-nin Ağdam, 1991-ci ilin iyul ayında isə Goranboy rayon bölməsinə ezamiyyətə göndərilib. 1992- 1993-cü illərdə MTN-nin Ağdam rayon şöbəsində könüllü xidmət edərək, keçirilən bir sıra hərbi əməliyyatlarda da yaxından iştirak edib. Ağdam rayonu erməni silahlı qüvvələri tərəfindən işğal olunmazdan 2 gün əvvəl bölmənin istifadəsində olan əməliyyat rabitəsini, icraatında olan bütün əməliyyat sənədlərini öz təkid və təşəbbüsü ilə şəxsən xilas edib. Mühüm sənədlərin düşmən əlinə keçməsinə imkan verməyən O.Əliyev həmin sənədləri MTN-nin Yevlax rayon şöbəsinə təhvil verib.

1993-cü ildə MTN-nin Biləsuvar və Yardımlı rayon şöbələrində əməliyyat müvəkkili vəzifəsində çalışıb.

Sonradan isə Azərbaycan Respublikası Milli Təhlükəsizlik Nazirliyinin özündə işlə təmin edilib. 1997-ci ildə "Qarabağ Müharibəsi Veteranı" adını qazanıb.

2006-cı il fevralın 27-də iş başında dünyasını dəyişib.

Twitter