Bəzi "ağıllı" sürücülər dayanma-durma qaydasını pozanda nömrənin üstünü bağlayırlar ki, qadağan olunmuş yerdə parklanma etdiklərinə görə BNA kameraları onları cərimələyərkən müəyyən edə bilməsin.

Ancaq sürücülər başa düşmür ki, elə nömrənin üstünü bağlamağa görə 800 manat cərimə nəzərdə tutulub.

Bu sözləri Axar.az-a nəqliyyat eksperti Elməddin Muradlı dayanma-durma qaydalarını pozan, qadağan olunmuş yerlərdə avtomobil saxlayanların cərimə olunmamaq üçün nömrələrini bağlayan sürücülərlə bağlı danışarkən bildirib.

Ekspertin sözlərinə görə, nömrənin üstünü xüsusi örtüklə bağlamağın cəriməsi dayanma-durma qaydasını pozmağa görə nəzərdə tutulmuş cərimədən qat-qat yüksəkdir və 20 manatlıq cəriməyə görə belə risk etməyə dəyməz:

“BNA belə faktları aşkar etdikdə dərhal Dövlət Yol Polisinə məlumat verəcək və həmin sürücü mütləq şəkildə 800 manat cərimələnəcək”.

Ekspert həmçinin bildirib ki, dayanma-durma qaydalarını pozanları cərimələməklə parallel, yeni dayanma-durma yerləri müəyyən etmək, bəzi yerlərdə saatdan və günlərdən asılı olaraq parkinqə icazə vermək lazımdır. Əks halda sürücülərin narazılığı və çarəsizliyi qaçılmazdır.

Twitter