Babəki həbs edən Əbu-Sac daha sonra Azərbaycanda yaranan Sacilər xanədanlığının (879-941) ilk nümayəndəsi olub.

Kult.az xəbər verir ki, bu barədə tanınmış tarixçi Əkbər Nəcəf qeyd edib. O bildirib ki, orta əsr tarixçisi Təbəri “Tarix ər-Rəsul” əsərində Xilafət İmperiyasına qarşı 20 il mübarizə aparan qüdrətli Azərbaycan sərkərdəsi Babəkin həbsi ilə bağlı müfəssəl məlumat verib:

“Afşinin əmrindəki ordular iki illik müharibədən sonra Bəzz şəhərini ələ keçirdikdə çıxış yolu qalmayan Babək bir müddətdir məktublaşdığı Bizans imperatorunun himayəsinə sığınmaq məqsədilə Bəzzdə dəhşətli küçə döyüşlərinin davam etdiyi bir vaxtda qarışıqlıqdan istifadə edib, qaçmağa nail oldu.

Döyüşləri sona çatdırıb, Babəkin qaçdığını öyrənən Afşin Əbu-Sacın əmrindəki 400-500 nəfərlik dəstəni onun ardınca göndərdi. Əbu-Sac Ərməniyyə ərazisində Babəkə çatıb, girdiyi döyüşdə onu tuta bilmədi. Lakin qardaşını, anasını, arvadını və əmirlərindən Müaviyəni əsir alıb Afşinə göndərdi.

Bundan sonra Babəkin təqibinə davam edən Əbu-Sac, nəhayət, 837-ci il sentyabrın 15-də Babəki həbs etdi və qiymətli əsiri ilə bərabər Bərzənddə ordugahında oturan Afşinin yanına gəldi”.

Twitter