Son vaxtlar valideynləri, xüsusən anaları narahat edən əsas məsələ uşaqların tez-tez xəstələnməsidir.

Bunun qarşısını almaq üçün valideynlər müxtəlif üsullara əl atsalar da, bəzən heç bir müalicə effekt vermir.

Məsələ ilə bağlı Axar.az-a açıqlama verən pediatr Altay Abdullaoğlu bildirib ki, uşaqların tez-tez xəstələnməsi müxtəlif səbəblərdən ola bilər. Buna genetik həssaslıq, ekoloji faktorlar, vitaminlər, bağça və ya məktəb təsir edə bilər.

Həkimin sözlərinə görə, uşaqların ildə 6-8 dəfə xəstələnməyi normaldır:

“Lakin elə uşaqlar var ki, bundan artıq xəstələnir və xəstəliyi ağır keçirir. Belə uşaqlar hərtərəfli müayinə edilməli, daxildən gələn problem varsa araşdırılmalıdır. Üst və alt tənəffüs yolu xəstəlikləri, immun çatışmazlığı, allergiyalar, ürək, qaraciyər xəstəlikləri, qanazlığı və s. kimi xəstəliklərin olub-olmaması yoxlanılır. Əgər uşaq sağlamdırsa, müayinələrdə hər şey normaldırsa və yenə də tez-tez xəstələnirsə, demək, onlarda genetik həssaslıq var.

Havanın təmizliyi, qaldığı evin mühiti, nəmliyi, evə günəş düşməsinin uşağın sağlamlığında çox rolu var. Ona görə kənd, rayon mühitində yaşayan insanlar daha sağlam olurlar. Çünki qidalanma, hava və bir çox şeylər daha təmiz və təbiidir.

Bir sıra vitaminlərin çatışmazlığı da tez-tez xəstələnməyə səbəb ola bilər. Buna ən çox D vitamini aiddir. C vitamini və sinkin də çatışmazlığı varsa, profilaktik olaraq bunlar təyin oluna bilər. Bu zaman xəstəliyi daha yüngül keçirtmə ehtimalı çoxalır. Lakin bu o demək deyil ki, valideynlər hər xəstələnəndə uşağa vitamin kompleksi versin. Əksinə vitaminlərin çatışmazlığı yoxdursa, onların qəbulu orqanizmdə ciddi problemlərə səbəb ola bilər”.

Pediatr bildirib ki, xüsusilə bağçaya gedən uşaqlar tez-tez xəstələnir. Bunun da qarşısını tam almaq təəssüf ki, mümkün deyil:

“Lakin bir sıra tədbirlərlə bu riski azaltmaq olar. Uşaqların 3 yaşdan sonra bağçaya getməsi, iyun-iyul aylarında bağçaya başlaması, ilk başlayanda yarım günlük getməsi, yəni orada yatmaması xəstələnmə riskini azaldır. Bundan əlavə, uşaq xəstələnən kimi bağçadan uzaqlaşdırmaq, ev şəraitində təbii vasitələrlə, yəni bəzi meyvələrlə - portağal, limon, mandalin, nar ilə qidalandırmaq və bal, bəkməz, bol maye verməklə evdə baxmaq lazımdır. Uşaq tam sağaldıqdan bir müddət sonra bağçaya getməlidir. Çünki tam sağalmamış uşaq bu dəfə ya xəstəliyi pisləşmiş, ya da ikinci bir xəstəliyə yoluxmuş halda həkimə geri dönür. Bu isə həm həkimin işini, həm də müalicəni çətinləşdirir”.

Həkim sonda bildirib ki, tez-tez xəstələnən uşaqları bundan qorumaq üçün onların qrip peyvəndi edilməsi məsləhətdir:

“Qrip peyvəndini tövsiyə edə bilərik. Bu peyvənd bütün xəstəliklərdən qorumasa da, tez-tez xəstələnən uşaqlara edilə bilər. Qrip peyvəndi hər il vurulur”.

Twitter