Bu günlərdə Birləşmiş Ərəb Əmirliklərinin paytaxtı Əbu-Dabi şəhərində keçirilən sərgidə Azərbaycanın öz pavilyonunu “Biz – bizim dağlarımız” abidəsi şəklində təqdim etməsi ermənilərin “qəzəbinə” səbəb olub.

Ermənistanın KİV orqanları bu başlıqlarla dolub-daşır: “Azərbaycanlılar erməni abidəsini özününkiləşdirmək istəyir”...

Axar.az abidənin kimə məxsus olması məsələsinə birdəfəlik nöqtə qoymaq üçün alim, texniki elmlər doktoru, professor, Azərbaycan Respublikasının Əməkdar Elm xadimi Kamran Rüstəmova müraciət edib. Həmsöhbətimizin sözlərinə görə, ermənilərin bu abidəni özününkü adlandırmağa haqqı çatmır, çünki bunun üçün bir çox əsaslar mövcuddur.

“Əvvəla, anlamaq lazımdır ki, ölkəmiz özünün simvolu qismində Azərbaycan şəhəri Xankəndinin girişində dayanan abidənin maketini seçib. Gəlin, 1967-ci ilə qayıdaq: məhz həmin ildə həm Dağlıq Qarabağın, həm də Xankəndi şəhərinin tərkibinə daxil olduğu Azərbaycan Sovet Sosialist Respublikasında sözügedən abidə inşa edilib. Təbii olaraq abidənin inşası Azərbaycan hökuməti tərəfindən maliyyələşdirilib”, - ekspert bildirib.

Ekspertin sözlərinə görə, sözügedən abidənin müəllifinin erməni olması onun Azərbaycana məxsus olmadığı anlamına gələ bilməz.

“Bəlkə bu gün abidə işğal olunmuş Azərbaycan torpaqlarında yerləşdiyi üçün “ermənilərin” olub? Bu ki axmaqlıqdır! Bu cür erməni məntiqi ilə Əbu-Dabidə xarici memarlar tərəfindən layihələndirilən onlarla bina və abidəni əcnəbilərin adlandırmaq olar. Onlar memarın aid olduğu dövlətə məxsusdur? Bəs onda Sankt-Peterburqda möcüzələr yaratmış italyan əsilli memarların möhtəşəm yeddiliyi necə olmalıdır?” - Rüstəmov bildirib.

Tarixçinin sözlərinə görə, ermənilərlə münasibətdə hər zaman kimin ağa olduğunu göstərmək lazımdır.

Twitter