2019.01.26 - 15:07

Fransada “sarı jiletlər” aksiyasının 11-ci mərhələsi başlayıb. Etiraz aksiyası paytaxtda müxtəlif məhəllələrdə keçiriləcək.

Axar.az xəbər verir ki, bu həftə aksiyalar həmişəkindən fərqli olaraq Paris və Bordo şəhərlərində “sarı gecə” aksiyası ilə davam edəcək.

Bildirilir ki, etiraz aksiyaları zamanı polisin LBD silahlarından istifadə etməsi bir çox aksiyaçının ağır yaralanması ilə nəticələnib. Aksiya iştirakçılarının polisin belə silahlardan istifadə etməməsi çağırışlarına hökumət məhəl qoymayıb və LBD silahlardan istifadə olunacağı bildirilib.

Bu həftə “sarı jiletlər” aksiyaçılarına etiraz edən yeni “qırmızı yaylıqlar” aksiyası da keçiriləcək.

“Sarı jiletlər” aksiyası səngimədiyi bir vaxtda Sartruvil şəhərində milli debatlara qoşulan Baş nazir E.Fillip “vətəndaş təşəbbüsü referendumu”nun əleyhinə olduğunu bildirib.

Qeyd edək ki, “vətəndaş təşəbbüsü referendumu” “sarı jiletlər”in əsas tələblərindən biridir.

***

Fransada “sarı jiletlər” etiraz aksiyasının 11-ci həftəsində 69 min aksiyaçı iştirak edib, keçən həftə ilə müqayisədə iştirakçıların sayı azalıb.

Parisdə 4000 aksiyaçı olduğu qeyd edilib. Bastiliya meydanına toplaşan aksiyaçılar polis tərəfindən dağıdılıb. Qarşıdurmada yaralananlar var. Etiraz aksiyasının təşkilatçılarından olan Jerom Rodriqe gözündən yaralanıb.

Parisdə və digər böyük şəhərlərdə polislə qarşıdurma zamanı gözyaşardıcı qazdan və su şırnağından istifadə olunub.

Nümayişçilər “sarı gecə” aksiyası üçün Respublika meydanına toplaşıblar.

Twitter