Azərbaycan qazı rus qazına alternativ bir mənbə kimi Qərb bazarında ciddi rəqabətə qoşulub.

Bu sözləri Axar.az-a Almaniya kansleri Angela Merkelin Bakıya gözlənilən səfəri ilə bağlı bəzi suallara aydınlıq gətirən sabiq dövlət müşaviri Qabil Hüseynli deyib.

Politoloq Almaniya kanslerinin Azərbaycana ilk səfərinin mühüm mətləblərdən xəbər verdiyini qeyd edib:

“Azərbaycanın dünyada artan rolu və xüsusilə də Avropa Birliyinin karbohidrogen ehtiyatlarla təchizatında oynadığı rol diqqət mərkəzindədir. Bu iki ölkə arasında əlaqələrin genişlənməsində müsbət rol oynayacaq. Avropanın Azərbaycanın qaz potensialı ilə bağlı müəyyən hədəfləri var. ABŞ Almaniyaya təzyiq edir ki, Baltik dənizinin dibindən Rusiyadan gələn ikinci qaz kəmərinin çəkilməsinə razılıq verməsin və üzünü Cənubi Qafqaza çevirsin. Merkelin də bu məsələdə çox diqqətli olacağını düşünürəm. Bütün bunlar isə o deməkdir ki, Azərbaycan qazı rus qazına alternativ bir mənbə kimi Qərb bazarında ciddi rəqabətə qoşulub. Bu, ölkəmizin siyasi çəkisinə və əhəmiyyətinin artmasına təkan verəcək”.

Politoloq bildirib ki, Merkel bacarıqlı və demokratik dövlətin xadimi kimi Azərbaycanla Almaniya arasında texnologiya, elm tutumlu müqavilələrin imzalanması üçün cəhdlər göstərəcək:

“Bu, həm də Bakının arzusudur. Məqsəd təbii ki, Azərbaycanın Avropa ilə gələcək əməkdaşlıq tellərinin daha da inkişaf etdirilməsidir. Bu məsələdə Almaniya dünyanın ən qabaqcıl ölkələri sırasına daxildir. Azərbaycan-Almaniya əməkdaşlığı möhkəm bünövrə üzərində qurulub. 28 alman şirkəti ölkədə iş aparır və gələcəkdə bu şirkətlərin sayı və əlaqələrin rəngarəngliyi arta bilər. Beləliklə, Azərbaycan-Almaniya əməkdaşlığı yeni və daha yüksək mərhələyə qalxa bilər. Bu nöqteyi-nəzərdən də Merkelin Bakıya səfəri tarixi əhəmiyyətli hadisədir”.

Qeyd edək ki, hazırda Gürcüstanda səfərdə olan Almaniya kansleri Angela Merkel daha sonra Ermənistan və Azərbaycana səfər edəcək.

Twitter